Rewşan Çelîkerê strana “Dîlo malê min dîlo” weşandiye

Rewşan Çelîkerê strana bi navê “Dîlo malê min dîlo” weşandiye.  Stran bi kurdî ye û di dîsgotinê de pevyên bi erebî hene. Stran li Herêma Serhedê weke berhemeke gelêrî ya devkî hatiye tomarkirin.

Hakan Gurbuzî stran aranje kiriye û Kadîr Yucel û Yasemîn Kurttekînê jî derhêneriya video-klibê kirine.

Rewşan Çelîkerê bi van gotinan behsa çîroka stranê û berhevkariya wê kiriye:

“Min ev stran di sala 2014an ji Bazîdê berhev kir. Ez ji bo xebatên çand û folklorê çûbûm wê derê. Ez ê hinekî behsa çîroka vê stranê ji we ra bikim. Em nizanin ka ev stran çend salî ye lê em dizanin ku ; bi xêra bazirganekî gerok hatiye Çaldıranê. Ew şev li wî gundî dawetek heye û bazirgan jî mêvanê wî gundî ye. Li herêma Serhedê çanda devkî gelekî biqewet e û stranên xwe bi hev ra dibêjin, dengê xwe didin ber dengê hev. Vêca dor tê ser vî bazirganî, gundî dibê gere tu jî stranekê ji me ra bêjî. Ew jî "Dîlo Malê Min Dîlo" dibêje. Gundî ji vê stranê pir hezdikin, çavkaniya vê stranê jî yekî ji wî gundî ye. (Ahmet Çelik, 90 salî) Stran bi salan di bîra wî gundî de dimîne lê belav nabê, nayê qeydkirin, ji hêla derdora herêmê nayê guhdarkirin. Stran bi kurdî destpê dike, di dîsgotinê da bi peyvên erebî didome.

"Dîlo Malê Min Dîlo rê li ber gencîneya dilê bêsînor vedike li ber me. Gelo dibe ku behsa evîneke du-zimanî, lê xwedî yek dilî dike? Vêga em bersiva vê pirsê nizanin lê xeyalkirina wê jî, têra xwe dilê me germ dike û stranê bi me dide hezkirin. Ev demeke dirêj e ku bi kelecaneke mezin ez li benda parvekirina vê stranê bûm ku bigîhînim we. Êdî "Dîlo Malê Min Dîlo" wê di bîr û bîranînên me tevan de ciyê xwe bigre. Kêfa stranê derînin û di bin vîdeoyê da me bê şîrove nehêlin.” (FD)