Rêveberiya Tevgerê: Belavkirina “notên hevdîtinê” provokasyoneke bi plan e
Rêveberiya Tevgerê li ser wan "notên hevdîtinê" daxuyaniyek da ku tê îdiakirin ên Abdullah Ocalan in. Her weha duh jî DEM Partiyê daxuyanî dabû.
Daxuyaniya Rêveberiya Tevgerê bi vî rengî ye:
“Hevdîtinên ku tên îdîakirin di dîrokên cuda de li Îmraliyê hatine kirin, li ser medyaya dîjîtal hatine weşandin. Di van nivîsên tên weşandin gelek îfadeyên derew û sixte hene, ev yek nîşan dide ku evane bi zanebûn tên amadekirin.
Balkêş û manîdar e ku ev notên hevdîtinê di 10ê Tebaxê roja derketina qanûnê de û piştî wê li ser medyaya dîjîtal hatin belavkirin. Derdorên dijberê aştî û civaka demokratîk, di rojên ku qanûna 10ê Tebaxê ya li Meclisê hate qebûlkirin tê nîqaşkirin de her cure rê û rêbaza qirêj bi kar anîne. Ji vî alî ve tê fêmkirin ku ev nivîs bi armanc û zanebûn tên amadekirin. Li ser medyaya dîjîtal belavkirina van nivîsan û xistina mijara nîqaşê, provokasyoneke bi plan a li dijî Pêvajoya Aştî û Civaka Demokratîk e.
Hevdîtinên li Îmraliyê bi Rêber Apo re tên kirin, ji aliyê şandeya DEM Partî ve ji çapemenî û raya giştî re tên ragihandin. Lewma divê ti kes bawerî bi ti agahî û nirxandina ku ji aliyê şandeya DEM Partî ve nehatiye ragihandin û teyîtkirin, neyîne. Jixwe têkildarî hevdîtinên ku tên îdîakirin, şandeya DEM Partî daxuyaniyek da.
Gelê me û raya giştî ya demokratîk divê her cure agahiya derbarê Tevgera me ya Azadiyê ji daxuyanî û nirxandinên Rêveberiya Tevgerê bizane. Divê her kes bi guman nêzî her agahiya ji aliyê Rêveberiya me ve nehatiye îfadekirin, bibe. Nirxandinên Tevgera me yên têkildarî gelek mijaran, ji çavkaniyên vekirî re tên weşandin. Notên hevdîtinê yên sexte yên dikevin ser medyaya dîjîtal, ji aliyê hêzên dijber ve li dijî Rêber Apo û Tevgera Azadiyê hatine amadekirin. Lewma divê ti kes bawerî pê neyîne.”
Daxuyaniya Şandeya Îmraliyê ya DEM Partiyê
DEM Partiyê ragihand ku destkarî li wan nivîsan hatiye kirin ku hinek beş hatine zêdekirin û hinek jî hatine derxistin.
Şandeyê bangî xelkê kir ku divê guh nedin wan belge û agahiyên ku ne fermî ne.
Şandeya Îmraliyê ya DEM Partiyê anî zimên ku rojên dawî li ser medyaya civakî bi navê "notên hevdîtinê" hinek nivîs tên belavkirin û ev metin bi Abdullah Ocalan ve tên girêdan.
Di daxuyaniyê de hat destnîşankirin ku di wan nivîsan de zêdekirin û jêderxistin hatine kirin.
Daxuyaniya Şandeya Îmraliyê wiha ye:
“Di van rojên dawî de, hin nivîsên ku wekî ‘notên hevdîtinê’ tên nîşandan û bi navê Birêz Abdullah Ocalan ve tên girêdan, dîsa li ser medyaya civakî hatine belavkirin.
Hin nivîs ku bi navê ‘notên hevdîtinê’ tên belavkirin, ne zelal e ku ji kû derê ne û li ser çi esasî ne. Di van nivîsan de hin tişt tên zêdekirin û hin jî tên rakirin. Her wiha dîsa hin gotin û îfadeyên derbarê kesan tên zêdekirin.
Di hin nivîsên ku bi navê ‘girtek’ tên belavkirin de jî hin îdia hene ku armanc dikin raya giştî bixapînin û pêvajoyê proveke bikin.
Em van nêzîkatiyan wekî çalakiyeke xeter dibînin ku rasterast dixwaze Birêz Ocalan û pêvajoya ku gihîştiye asteke girîng sabotaj bike. Em eşkere dibêjin ku ev tişt ti carî nayê qebûlkirin.
Em careke din dixwazin bibêjin ku tenê divê belge, not û agahiyên ku ji Şandeya Îmraliyê yan jî ji malbat û parêzerên ku bi Birêz Ocalan re hevdîtin dikin, tên û li ser bingehek fermî ne, bên bawerkirin.”