Ajansa nûçeyan a fermî ya Sûriyeyê SANAyê ragihand ku di navbera Sûriye û Îsraîlê de li ser mijara ‘ewlehiyê’ hevdîtinek hat lidarxistin.
Li gorî çavkaniyeke dîplomatîk a ji Wezareta Karên Derve ya Sûriyeyê ku ji SANAyê re axiviye, şandeya bi serokatiya Wezîrê Karên Derve Esad Hesen eş-Şeybanî, bi navbeynkariya Dewletên Yekbûyî yên Amerîkayê(DYA) û bi mazuvaniya Urdunê bi şandeke Îsraîlê ya paye bilind re civiya ye.
Hate diyarkirin ku di şandeya bi serokatiya Eş-Şeybanî de Serokê Îstîxbarata Giştî ya Sûriyeyê û Serokê Îstîxbarata Leşkerî jî cih girtine.
Li gorî nûçeyê, di civîna ku piştî êrîşên dawî yên Îsraîlê yên li ser axa Sûriyeyê û geşbûna rageşiya li başûrê welat hat lidarxistin de, aliyan “mekanîzmayên praktîkî yên ji bo rawestandina êrîş, destbeserkirin û armancgirtinên Îsraîlê” gotûbêj kirin.
Wezareta Parastina Neteweyî: Li Ebu Zuhurê ti şandeyeke leşkerî ya Tirk tune bû
Li gorî çavkaniya ku ji SANAyê re axiviye, aliyê Sûriyeyê diyar kir ku welatê wan dewleteke serwer e, mafê wan heye ku artêşa xwe ya neteweyî ji nû ve ava bikin û pêş bixin, her wiha li gorî berjewendiyên xwe yên neteweyî hevpeymaniyên xwe diyar bikin. Çavkaniyê ragihand ku aliyê Sûriyeyê ti rêkeftineke ku van mafan sînordar bike nakeve binê wê û qebûl nake.
Şandeyê her wiha destnîşan kir ku divê hêzên Îsraîlê vekişin xetên beriya 8ê Kanûna 2024an û Peymana Cudakirina Hêzan a sala 1974an ji nû ve bê sepandin.
SANAyê ragihand ku aliyan di hevdîtinan de bal kişandine ser girîngiya piştgirîdana aramiya Sûriyeyê, parastina ewlehiya herêmî û rêgirtina li ber encamên rageşiya heyî ya di navbera Tirkiye û Îsraîlê de ku neyên ser axa Sûriyeyê.
Êrişa 'Ebu Zuhur'ê ya Îsraîlê tê çi wateyê?
Çapemeniya Îsraîlê hevdîtin çawa nirxand?
Malpera nûçeyan a Times of Israelê nivîsî ku li ser navê Îsraîlê Serokê Mossadê Roman Gofman beşdarî civînê bûye. Di nûçeyê de li gorî agahiyên ji du çavkaniyên ku ji AFPyê re axivîne hate ragihandin ku di civînê de mijarên wekî avakirina 'odeyeke operasyonê ya taybet' li Urdunê di bin çavdêriya DYAyê de û pêşîgirtina li rageşiyên gengaz ên li Sûriyeyê ku dibe Tirkiye jî di nav de be, hatine gotûbêjkirin.
Televizyona Kanal 12 a Îsraîlê jî ragihand ku hevdîtin erênî derbas bûye û wekî gava yekem a ji bo ji nû ve destpêkirina danûstandinên rasterast yên di navbera her du welatan de hate nirxandin.
Li gorî Kanal 12ê, hatibû plankirin ku civîn hefteya borî bê lidarxistin, lê piştî êrîşa Îsraîlê ya li ser 'Ebû Zuhûr' hatibû paşxistin. Di nûçeyê de her wiha hat îddîa kirin ku rêveberiya Trump ji bo kêmkirina rageşiya di navbera Îsraîl, Sûriye û Tirkiyeyê de beriya hilbijartinên li Îsraîlê yên ku nêzîk dibin, bi tundî ketiye navberê da ku ev civîn pêk bê.
*Serokê Mossadê Roman Gofman û Wezîrê Karên Derve yê Sûriyeyê Esad Hesen eş-Şeybanî. (Fotograf: Times of Israel)"
(VC/AY)
