Raportora Taybet a Parazvanên Mafên Mirovan a Neteweyên Yekbûyî (NY) Mary Lawlorê têkildarî doza Tahîr Elçiyî ku danişîna biryarê wê sibê pêk were, li ser hesabê xwe yê medyaya civakî daxuyanî da.
Lawlorê got ku ew ê şopandina doza kuştina Tahîr Elçiyî bidomîne:
“Ez hêvî dikim ku berpirsiyarên kuştina Elçî wê bi biryara sibê bên cezakirin. Girîng e ku berpirsên kuştinê li pêşberî dadgehê hesab bidin û mirina Elçî bêceza nemîne.”
"Bila doza Tahîr Elçî bê ceza nemîne"
Çi bûbû?
28ê Çiriya Paşiyê ya 2015ê de serokê Baroya Amedê, Tahîr Elçî hat kuştin. Lêpirsîna ji bo bûyerê nehatiye encamdan û bûyer hê jî nehatiye zelalkirin
Pêvajoya Darazê
Serdozgeriya Amedê, îddîanameya kuştina Tahîr Elçiyî ya 28ê Mijdara 2015an, di 26a Adara 2020an de amade kiriye. 10emîn Dadgeha Cezayê Giran a Amedê di 3ê Nîsana 2020an de ev îdianame qebûl kiriye.
Di îddîanameyê de sê jê polîs çar bersûc wek gumanbar hatine nîşandan.
Ji bo polîsên bersûc M. S., F. T. û S. T.yî bi hinceta "bi îhmalkariya bi zanebûn bûye sedema mirinê" ji 2 heya 6 salan cezayê girtîgehê tê xwestin.
Ji bo gumanbarê din, Ugur Yakişir jî bi "kuştina bi zanebûn, kuştina bi mebestên gengaz, dijberiya li dijî qanûna jimare 6136, binpêkirina yekîtiya dewlet û welatî, zerardana malî" tê tawanbar kirin û ji wî re cezayê hepsê yê heta hetayê tê xwestin.
Yakişirî, ji xêncî kuştina Elçiyî, bi kujeriya polîsên eynê rojê hatine kuştin ên bi nave Cengîz Erdur û Ahmet Çîftaslan jî tê tewanbarkirin.
