Tê zanîn ku şêweyên mûzîka hîp-hopê ji serê sala 2000î ve di nav kurdan de belav bû û wek destpêkê jî Serhedo pêşîvantiya wê kir. Di roja îroyîn de ji teliyên destan derbas neke jî ji Xem, pîroz, Reqso hetta çend kesên din jî êdî dengê stranên hîp-hopê bilind dibe.
Yek ji van kesan jî Baran Atabay ango Barody e. Baran dersdêrê mûzîkê ye û bi salane ku bi hîp-hopa kurdî ve eleqedar e.
Hetta niha gelek sitran nivîsîne û her wiha bi heman şêweyê bi salan berê 2 albûm jî derxistine lê ji ber şert û mercên heyî albûm nehatine belavkirin. Di serê meha Gulanê de strana xwe ya bi navê ‘Jaro’ ku di naveroka de rexneyan li ciwanên ku xwe ji çanda xwe dûr dixin û bi zimanên din distirin dike, derxist.
Bi Baran re em rûniştin me soxbete xweş li ser stranbêjiya wî û hîp-hopa kurdî kir.
Hîp-Hopbêj Baran Atabay hem derbarê kar û xebatên xwe de hem jî li ser hîp-hopa kurdî bi bianetê re axivî û got:
“Ji ber ku li vî welatî di dibistanan de tenê bi zimanê tirkî perwerde heye, êdî kurd ji zimanê xwe dûr dikevin û nikarin bi kurdî bifikirin û biafrînin. Ji ber vê yekê jî gava ciwanên berê xwe bidin mûzîkê divê bi zimanê xwe yê zikmakî sitranbêjiya xwe bikin û li çanda xwe xwedî derkevin.”
(WT/AY)
