Psychology Kurdiyê hejmareke taybet li ser koronavîrusê amade kiriye
Kovara Derûnnasiyê Psychology Kurdî li ser vîrûsa koronayê hejmareke taybet amade kiriye û ev hejmar li ser medyaya medyaya civakî belav kiriye. Edîtorên kovarê hejmara ku amade kirine li ser hesabên xwe yên medyaya civakî belav kirine da ku gelek kes jê sûdê werbigirin. Weke ku tê zanîn ev kovar ji 4 mehan carekê derdikeve û her hejmar berê xwe dide mijarekê. Di vê hejmara taybet de jî gelek nivîs li ser vîrûsa koronayê hatine weşandin. Ji bilî nivîsên li ser koronayê di kovarê de wergera pirtûkekê jî heye.
Ev pirtûkabi navê “Bo Vîrûsa Koronayê Pirtûka Xebatê ya Anksiyeteyê” ye (Coronavirus Anxiety Workbook) ji bo tendirustiya derûnî weke rêberekê ye. “Komeleya Tendirustiyê” (The Wellness Society) pirtûk amade kiriye.
Nivîsên di vê hejmarê de ev in
Di vê hejmara taybet de; Prof. Dr. Dr. Jan Îlhan KIZILHAN bi nivîsa xwe ya “Tendirustiya Derûnîû Pandemiya Covîd-19ê” derbarê şewbê xwendekar agahdar kirine û tendirustiya derûnî vekolaye.
Dr. Necat KESKÎN bi nivîsa xwe ya “Muzîk û Korona an jî di Rojên Koronayê de Muzîk” behsa reng û dengê muzîkê kiriye.
Bi nivîsên xwe; Derûnbijîşk Dr. Azad DILDAR “Psî-Korona Şewba Xedar û Derûniya Mirov”, Derûnnas Siyabend ASLAN “Vîrûsa Koronayê û Derûniya Mirovan” û Derûnnas Leyla NISÊBÎNÎ “Şewba Koronayê û Bertekên li Hember Wê” li ser bêpergaliyên derûnî û rewşa mirovan zanyarî dane.
Derûnnas Yusuf SİYAHTAŞ bi nivîsa xwe ya bi navê “Di Çarçoveya Derûnnasiya Peresanî de Nirxandina Covîd-19ê” bi nêrîneke peresanî Covîd- 19ê nirxandiye.
Şêwirmendê Derûnî Erdal GÜL bi nivîsa xwe ya kirmanckî “Kovîd-19e û Hîs Dayena ma” bandora Covîd- 19ê li ser mirovan berçav kiriye.
Derûnnasê Klînîkî Newroz Xebat YILDIRIM bi nivîsa xwe ya “Covîd-19 û Sendroma Piştî Dermankirina Giran; SPDG” bal kişandiye ser sendroma piştî dermankirina giran.
Nivîseke din ku li bandora koronayê ya li ser zarokan bikole “Parastina Zarokan Ji Vîrûsa Koronayê” ye. M.Salih BEDIRXAN ev nivîs latînîze kiriye.
Nivîsa “Di Rojên Koronayê de Jûra Wêjekaran”, weke lêpirsînekê ye ku Kenan ÖRMEK tevgera wêjekaran bi çend pirsan nîşan daye. (FD)
Hûn dikarın hejmara taybet ya Psychology Kurdî ji vê lînkê bixwînîn:
https://psychologykurdi.wordpress.com/2020/05/31/psychology-kurdi-hejmara-taybet/