Malbata Kaya ku ji 10 kesan pêk dihat, şevê din saet derdora 21.00’an dema ji navçeya Bayrampaşaya Stenbolê ji seyranê vedigeriyan, di rê de bi hinceta ku di wesayîta xwe de li stranên Kurdî guhdarî dikin ji aliyê polîsan ve hatin derbkirin û desteserkirin.
Li gorî nûçeya Ajansa Mezopotamyayê ji endamên malbatê zarokek û Zeynep Yaman a ducanî bi giştî 3 kes hatin berdan û 7 kes jî sewqî rêvebiriya emniyetê hatin kirin.
Piştî îfadeyên li emniyetê jî sewqî Edliyeya Çaglayanê hatin kirin.
Dozgeriyê endamên malbatê Ahmet Kaya, Umut Kaya û Yakup Kaya bi daxwaza girtinê şand dadgehê.
OHD: Ji bo ku ev sûc bêceza nemîne em ê pêvajoyê bişopînin
Şaxa Stenbolê ya Komeleya Hiquqnasên Ji Bo Azadiyê (OHD) diyar ku malbatek ji ber ku li muzîka Kurdî guhdarî dikir, rastî tundkariya polîsan hatiye û 10 endamên wê hatine desteserkirin.
Li gorî daxuyaniya OHDyê malbatek dema ji seyrangehê vedigeriya, ji ber ku di otomobîla xwe de li muzîka Kurdî guhdarî dikir, polîsên ne li ser kar vîdeoya wan girt.
Malbatê li hemberî vê yekê nerazîbûn nîşan da û li ser vê yekê hat îdiakirin ku “polîsan bi şkenceyê endamên malbatê desteser kirine”.
Di daxuyaniyê de hat diyarkirin ku ji heman malbatê 10 kesên ku di nava wan de zarokek û jineke ducanî jî hene desteserkirî ne û 8 ji wan dê sewqî dozgeriyê bên kirin.
Têkildarî mijarê Komeleya Hiquqnasên Ji Bo Azadiyê (OHD) daxuyanî da û got:
“Divê demildest lêpirsîn li ser wan polîsan were destpêkirin ku tehemula wan ji muzîka Kurdî re jî nîne û bi şkenceyê bersivê didin. Divê polîsên sûcdar ji kar bên dûrxistin. Ji bo ku ev sûc bêceza nemîne em ê pêvajoyê bişopînin.”
Piknikten döndükleri sırada araçlarında Kürtçe müzik açtıkları için, görevli olmayan polis memurları tarafından videolarının çekilmesine itiraz eden aile, polis tarafından işkence edilerek gözaltına alınmıştır.
— ÖHD İstanbul (@ohd_istanbul) July 13, 2025
Bir çocuk ve hamile bir kadın olmak üzere aynı aileden 10 kişinin… pic.twitter.com/UwjQLYfbbg
Vîdeoya ku tê îdiakirin girêdayî bûyerê ye, li ser medyaya civakî hat parvekirin. Di vîdeoyê de nîqaşa di navbera polîsan û kesên hatine desteserkirin de xuya dike.
Birêvebiriya Ewlehiyê ya Stenbolê heta niha derbarê bûyerê ti daxuyanî nedane.
(AY)
