Fotograf: Ajansa Mezopotamyayê
Ji bo nûçeya tirkî / ingilîzî bitikîne
Polîsan li Agiriyê bi ser mala Betul Yaşar, Hevşaredara Giyadînê de girtiye û ew desteser kiriye. Şaredariya Giyadînê di destê Partiya Demokratîk a Gelan (HDP) de ye.
Polîs demeke dirêj li mala Yaşarê geriyane û ew desteser kirine. Paşê jî birine Midûriyeta Emniyetê ya Giyadînê.
Li gorî nûçeya Ajansa Mezopotamyayê, li gel Yaşarê polîsan avêtiye ser malên Mesût Arslan û Mûstafa Alparslanî û ew desteser kirine.
Dîsa li gorî heman lêpirsînê Zeynel Abîdîn Bozkûrt, li Düzceyê hatiye desteserkirin.
Polîsan şaredarî dorpêç kiriye
Abdullah Koç, Parlamenterê HDPyê yê Agiriyê gotiye polîsan deriye şaredariyê şikenandiye û ketine hundir.
Polîsên ku şaredarî dorpêç kirine, nehiştine ti kes bikeve nava avahiyê.
Qeyûm ji bo 46 şaredariyan hatiye tayînkirin
Piştî hilbijartina 31ê Adara 2019an polîsan avêtibûn ser malên hevşaredarên HDPyê û ew desteser kiribûn. Paşê jî qeyûm tayîn kiribûn li ser wan şaredariyan.
HDPyê di wê hilbijartinê de sê jê bajarên mezin, pênc bajar, 45 navçe û 12 jê bajarok, li ser hev 65 şaredarî bi dest xistibû.
Heta niha qeyûm ji bo 46 şaredariyan hatiye tayînkirin. Saziya Bilind a Hilbijartinê (YSK) bi sedema ku beriya hilbijartinê bi Biryarnameyên di Hukmê Qanûnan de (KHK) ji wezîfeyê hatine dûrxistin, mazbata nedabû 6 şaredarên HDPyê. (TP/FD)
