Polîsan bi ser avahiya HDK û HDPê de girtine
Ji bo nûçeya tirkî / ingilîzî bitikîne
Ji ber lêpirsîna ku Serdozgeriya Komarî ya Tekîrdagê daye destpêkirin, polîsan destê sibê li 10 bajaran bi ser avahiyên Partiya Demokratîk a Gelan (HDP) û Kongreya Demokratîk a Gelan (HDK) ve girtine.
Serdozgeriyê hevserokên HDPyê yên çendîn bajaran jî tê de, ji bo 42 kesan biryara desteserkirinê daye.
Hevserokê rêxistina bajarê Stenbolê yê HDPyê Ferhat Encu, li ser hesabê xwe yê Twitterê nivîsiye: "Me çavê xwe bi pêla desteserkirinan vekir ku navenda wê Tekîrdag û gelek hevserokên me yên bajaran jî di navê de hene. Gelek hevalên me hatine desteserkirin."
Polîsan di heman saetan de bi ser avahiya Navenda Giştî ya HDKyê jî girtine ku li Beyoglûyê, navçeya Stenbolê ye.
Polîsan deriyê avahiyê şikandiye û demekê li hundir geriyane. Li gorî zanyariyan, polîsan dest daniye ser hin materyalan.
Kesên ku heta niha hatine desteserkirin ev in: Rêveberê Navenda Giştî yê HDPyê Abdurrahman Ozturk, Endamê Navenda Partiyê yê HDPyê Kenan Yildiz, Hevserokê rêxistina Kirikkaleyê yê HDPyê Yakûp Aslan, rêveberê rêxistina navçeya Bagcilarê yê HDPyê Ramazan Kirkpınar, Hevserokê rêxistina navçeya Beylikduzuyê yê HDPyê Îrfan Hulaku, Hevserokê rêxistina bajarê Edîrneyê yê HDPyê Melahat Çelîk, Hevseroka berê ya rexistina bajarê Tekîrdagê ya HDPyê Alev Ateş, rêveberên HDPyê Omer Guven, Huseyîn Gozen, Emîn Şen û Ercan Ogeday, rêveberê MATUHAYDERê Cîhan Kartal.
Li Wan û Çewligê jî gelek kes desteser kirine
Polîsan li Wan û Çewligê jî di heman deman de bi ser gelek malan de girtine. Li Wanê Behiye Kamaç, Mehmet Salîh Demîr, Omer Işik, Behîce Abî, Şahîn Aydemîr, Sûat Ozbek, Siddik Abî û Hevşaredarê Tûşbayê, Yilmaz Berkî ku ji ber KHKyî bû namzetê AKPyî li şûna wî wezîfedar kiribûn, desteser bûne. Li gorî zanyariyan dibe ku hejmara desteserkiriyan zêde bibe.
Li Çewligê jî ji ber lêpirsîna ku Serdozgeriya Komarî ya Çewligê daye destpêkirin, Hevseroka berê ya rêxistina HDPya Çewligê, Saadet Firat hatiye desteserkirin. Polîsan bi ser mala Firata ku nexweşa pençeşêrê ye girtiye û ew birine Midûriyeta Emniyetê ya Çewligê.
(RT/FD)