Ji bo nûçeya tirkî / ingilîzî bitikîne
Weşanxaneya Avestayê pirtûka bi navê “Belkî îşev binive” ya Mûrat Bayramê rojnameger çap kiriye. Di pirtûkê de çîrokên wan bûyeran heye ku di dema qedexeya derketina derve li Sûr, Farqîn, Lice, Cizîr, Silopya, Şirnex û Nisêbîn qewimî ne.
Mûrat Bayramê 10 sal in ku karê rojnamegeriyê dike, di salên 2015-2016ê van navçeyan ji bo medyaya navnetewî nûçe şopandiye. Bayramî çavdêriyên ku di dema şopandina van nûçeyan de kiriye, bi zimanê çîrokan honandiye û di pirtûkê de bi cih kiriye. Ji ber wê jî pirtûk nimûneyeke rojnamegeriya edebî ye.
Mûrat Bayramî li gel çîrokan, zêdetirî 30 fotografên ku wê demê li wan bajaran kişandiye jî xistiye nava rûpelên pirtûkê.
Bayram wê li Amedê pirtûka xwe îmze bike
Pirtûka “Belkî îşev binive” sibê (25ê Îlonê) li Pêşangeha Pirtûkan a Amedê û di heman demê de wê li pirtûkfiroşan jî bê firotin.
Mûrat Bayram jî wê ji 27ê Îlonê heta roja dawiyê ya Pêşangehê wê li Amedê be û pirtûka xwe îmze bike.
Yek ji çîrokên ku di vê pirtûkê de ne, wê di pirtûka bi navê "Antolojiya Çîrokên Kurdî" de jî bê weşandin. Ev pirtîk jî yek ji pirtûkên Weşanxaneya Avestayê ye û wê sibê di dest bi belavkirin û firotinê bê kirin. Di nava wê de 150 çîrokên çîrokbêjên kurdan yên ji destpêkê heta roja me hene.
Derbarê Mûrat Bayramî de
Edîtorê bianet kurdî ye. 10 sal in ku karê rojnamegeriyê dike. Di Kurd1 TV, Rojnameya Evro, Waar TV û Kurdistan TVyê de weke edîtorê nûçeyan, qunciknivîs û nûçegihan xebitî ye. Li navçeyên Sûr, Farqîn û Liceyê yên Diyarbekirê, navçeyên Cizîr; Silopya û navenda Şirnexê û li navçeya Nisêbînê ya Mêrdînê li ser qedexeya derketina derve ji bo medyaya navneteweyî nûçe nivisîne.
Bayramî ji bo New York Times, Al Jazeera International, Deutsche Welle, Middle East Eye û RT TVyê wêne û vîdeo girtine, nûçe nivisîne û wergêrî kiriye. Xwediyê hin xelatên çîroknivîsiyê û rojnamegeriyê ye. (FD)
