Li gorî biryara Serokomariyê a bi hejmara 10113an ku di 20ê Tîrmeha 2025an de di Rojnameya Fermî de hat belavkirin, dema Peymana Xeta Boriya Petrola Xav a Tirkiye-Îraqê 27ê Tîrmeha 2026an xelas dibe.
Xeta Petrolê ya Îraq-Tirkiyeyê ku wekî Xeta Petrolê ya Kerkûk-Ceyhanê jî tê zanîn, di çarçoveya peymana ku 27ê Tîrmeha 1973yan di navbera her du hikûmetan de hatibû îmzekirin, ji bo veguhastina petrola xav a Kerkûkê û zeviyên din ên Îraqê ber bi Bendera Ceyhanê ve hatibû çêkirin.
Di vê xetê re veguhastina yekem a petrolê 25ê Gulana 1977an dest pê kiribû.
Peyman herî dawî sala 2010an hatibû nûkirin û dema wê 15 salan hatibû dirêjkirin.
Di Xeta Boriya Petrolê ya Ceyhanê re herî dawî petrola Herêma Kurdistanê dihat hinartin.
Ew hinarde jî ji Adara 2023yan ve piştî biryara Dadgeha Navneteweyî ya Bazirganiyê ya Parîsê, ji aliyê Tirkiyeyê ve hatibû rawestandin.
Zêdetirî du salan e ku ew xeta boriyê nayê bikaranîn.
(AY)
*Çavkanî: Rûdaw
