Ji bo nûçeya Tirkî / Îngilîzî bitikîne
Serokwezîra Almanyayê Angela Merkelê bertak nîşanî wê hişyariyê da ku Wezareta Karên Derve ya Tirkiyeyê ji bo çûna Almanyayê welatiyên Tirkiyeyê hişyar kiribû.
Li gorî nûçeya beşa Tirkî ya Deutsche Welleyê Merkel li bajarê Delbrückê di dema bernameya hilbijartinê de axiviye û wiha gotiye:
“Ez dixwazim vî tiştî bi awayekî vekirî bibêjim, her yek ji welatiyên Tirkiyeyê dikarin serdana welatê me bikin. Li welatê me rojnameger nayên girtin, li welatê me prensîbên dewleta hiqûqê û azadiya fikrê hene. Em jî bi vê serbilind in.”
Serokê Midûriyeta Serokwezîrtiya Almanyayê Peter Altmeierî jî li ser hesabê xwe yê Twitterê bertek nîşanî daxuyaniya Tirkiyeyê da û wê weke “henekeke xerab” nirxandibû.
Namzetê serokwezîrtiyê yê Partiya Demokratên Sosyal (SPD) Martin Schulz, Sekreterê Giştî yê Yekîtiya Xiristiyanên Demokrat (CDU) Peter Tauber, Parlamentera Partiya Çep Sevîm Dagdelen û Hevserokê Partiya Keskan Cem Ozdemîr jî duh bertek nîşanî daxuyaniya Wezareta Karên Derve dabûn.
Wezaretê çi gotibû?
Li gorî nûçeya Ajansa Anadolûyê, Wezareta Karên Derve bi daxuyaniya nivîskî gotibû ku welatiyên Tirkiyê yên ku plana çûna Almanyayê dikin û yên li Almanyayê dijîn divê “bi tedbîr bin, li hemberî dijminantiya biyaniyan û tevgerên nijadî, êrîşên devkî û tevgeran xwînsar tevbigerin”. (NV/FD)
