Wezareta Tenduristiyê ya li Xezeyê lîsteyek berfireh a zarokên ku di êrîşên Îsraîlê yen li ser Xezeyê de mirine, weşand. 593 roj in êrişên Îsraîlê bê navber didomin.
Lîsteya navborî ya ku wezaretê li ser kanala xwe ya Telegramê parve kiriye, qonaxa di navbera 7ê Cotmeha 2023an û 11ê Gulana 2025an de vedihewîne. Di lîsteyê de navên 16 hezar û 506 zarokên ku temenê wan di navbera 0-17 salî de ye cih digire.
Li Xezeyê heta niha 53 hezar û 573 kes mirine
Wezaretê destnîşan kir û got, "Ev statîstîka balkêş radixe berçavan ku beşên herî bêguneh û bêparastin ên civakê rasterast û bi awayekî sîstematîk têne hedefgirtin."
Wezaretê li gorî komên temenî dabeşkirin kuştina zarokan wiha aşkere kir:
- 1 salî û piçûktir: 916 zarok
- 1-5 salî: 4 hezar û 365 zarok
- 6-12 salî: 6 hezar û 101 zarok
- 13-17 salî: 5 hezar û 124 zarok
Wezaretê bang li civaka navneteweyî kir
Wezaretê di daxuyaniya xwe de got, "Ev zarokên ku divê xwedî mafên parastin, lênêrîn û perwerdeyê bin, mixabin bûne hedefa balafirên şer û tankan."
Her weha di daxuyaniyê de ji civaka navneteweyî, rêxistinên mafên mirovan û rêxistinên alîkariya mirovî hat xwestin ku:
"Em bang li wan dikin ku berpirsiyariyên xwe yên yasayî û exlaqî bicîh bînin, demildest tedbîrên pêwîst bigirin da ku êriş rawestin û rêberên dagirker ji ber tawanên li dijî zarok û sivîlên bêçek hesap bidin."
(VC/AY)
