Li Tartûs û Humsê 4 jê zarok 12 sivîl hatin qetilkirin
Di 8ê Kanûna Pêşiya 2024an de piştî bidawîbûna rejîma Esed êrişên li dijî Elewîyan zêde bûn û ji 6ê Adara 2024an ve jî êriş veguherîn operasyonên paqijkirina etnîkî û ev êrişana hê didomin.
Li gorî nûçeya Malbenda Çavderiyê ya Mafên Mirovan a Suriyeyê (SOHR) ku navenda wê li Londonê ye, di yekem roja Cejna Remezanê (31ê Adarê) de, li bajarên Tartûs û Humsê 2 êrîş pêk hatin û di encamê de 4 jê zarok, 12 sivîl hatin qetilkirin.
ÊRİŞÊN Lİ DİJÎ ELEWİYAN DİDOMİN
Li Suriyeyê hejmara sivîlên ku hatine kuştin derket 973an
Li gundê Elewiyan ê Harf Binamra ya navçeya Baniyas a Tartûsê, endamên Rêvebiriya Operasyonên Leşkerî di nav de zarokek û piraniya wan extiyar 6 kes înfaz kirin.
Çavkaniyên SOHRê diyar kirin ku êrîşkar ji El-Disneyê ku li bejahiya Baniyasê ye baregeha berê ya artêşa Sûriyê lê ye, hatine. Her weha êrişkaran berî bûyerê dirûşmên mezhebî berz kirine û 6 kes bi guleyan qetilkirin.
Li gorî nûçeya Enab Baladîyê ku dezgeheke mixalîf a Sûriyeyê ye û navenda wê li Stenbolê ye, kesên çekdar çûne mala kesekî bi navê Sumer Şahîn ku li gund dijî û navê muxtarê gund Cevdet Faris pirsîne. Sûmer Şahîn neçar kirin ku bang li mixtar bike.
Piştre çekdaran muxtarê gund Cevdet Faris û kurê wî Necdet, xwediyê malê Sumer Şahîn, kurê wî Îbrahîmê 12 salî, birayê wî Sair û bavê wî Îbrahîm înfaz kirin.
Piştî êrîşê endamên Rêvebiriya Ewlekariya Giştî çûn gund û bi mezinên gundiyan re hevdîtin kirin. Di vîdyoya hevdîtinê ya li ser rûpela fermî ya facebookê ya Walîtiya Tartûsê hat parvekirin de, rayedarekî ewlekariyê diyar dike ku berpirsyarên qetlîamê teqez dê bên cezakirin.
SOHRê ragihand ku di heman rojê de hêzên ewlehiyê 2 kes desteser kirin û her weha SOHRê destnîşan kir ku divê ev kes neyên berdan û teqez bên darizandin.
*Zarokê bi navê Îbrahîm Şahîn ê li Harf Binamrayê hat qetilkirin ku ji aliyê SOHRê parve kiriye.
Di êrîşa li Humsê de 6 sivîl hatin kuştin
SOHRê ragihand ku di heman rojê de li taxa Kerem ez-Zeytûn a Humsê, bi ser mala malbateke elewî de girtin. Êrîşkaran kesên di malê de gulebaran kirin û dayik û 3 zarokên wê kuştin. Di êrîşê de bav bi giranî birîndar bû.
Li gorî çavkaniyên SOHRê 2 kesên din ên ku di dema êrîşê de li malê mêvan bûne jî jiyana xwe ji dest dane.
SOHRê hêzên ewlekarîyê weke berpirsê êrîşêne nirxand û Enab Baladiyê jî nivîsiye ku êrîş ji aliyê kesên nenas ve hatiye kirin.
(VC/AY)