Walîtiya Stenbolê bi daxuyaniyekê aşkere kir ku li seranserê bajêr meşên xwenîşandanê, civînên çapemeniyê, çalakiyên rûniştinê û yên weke wan di navbera 19-23ê Adarê de hatine qedexe kirine.
Daxuyaniya walîtiya Stenbolê weha ye:
"Ji bo parastina pergala raya giştî ya li bajêr û ji bo rêlibergirtina çalakiyên provokatîv ên ku dikarin derkevin, di navbera 19-23yê Adarê de her cure civîn, xwenîşandan û daxuyaniyên çapemeniyê hatine qedexekirin."
Di çarçoveya biryarê de ji 19ê Adara 2025an û pê ve stasyona metroyê ya Emniyet-Fatîhê ya li ser xeta M1A Yenîkapi - Ataturk Airport û M1B Yenikapi - Kirazlıyê li gel hemû deriyên ketin û derketinê wê ji xizmetê re bên girtin. Her wiha wê xeta metroyê ya M2 ya Yenîkapiyê-Seyrantepe-Haciosmanê wê li stasyona Taksîmê bê rawestandin.
Di çarçoveya lêpirsîna li ser Şaredariya Bajarê Mezin a Stenbolê de derbarê 105 kesan biryara desteserkirinê hat dayîn.
Serokê Şaredariya Bajarê Mezin a Stenbolê Ekrem Îmamoglu jî di vê çarçoveyê de hat desteserkirin.
Serokê Şaredariya Şişliyê ya Stenbolê Resul Emrah Şahan, şêwirmendê Îmamoglu yê çapemeniyê Murat Ongun û rojnameger Îsmaîl Saymaz jî hatin desteserkirin.
(EMK/AY)
