Li rojnameger Bêrîtan Canozerê salek û 3 meh cezayê girtîgehê hat birîn
Danişîna doza rojnameger Bêrîtan Canozerê li 4emîn Dadgeha Cezayên Giran a Amedê hat lidarxistin. Canozer ji ber parvekirinên xwe yên li ser medyaya civakî ên di sala 2015an ên têkildarî qedexeya derketina kolanan a li Sûr a Amedê tê darizandin.
Bêrîtan Canozer beşdarî danişînê nebû lê parêzerê wê Muharrem Erbey li danişînê amade bû.
Parêzer Erbey di danişînê de got ku rojnamegeriya li herêmê weke sûc tê hesibandin û bûyerên tên ragihandin weke sûc tên nîşandan. Erbey, got ku hêmayên sûc ên madî û manewî çênebûne û daxwaza beraetê ji bo miwekîla xwe kir.
Dadgehê jî biryara xwe eşkere kir û bi îdiaya ku “propagandaya rêxistinê kiriye” salek û 3 meh cezayê girtîgehê birî.
Dadgehê, biryara taloqkirina cezayê betal kir û biryar da ku hukm were cîbicîkirin.
(HA/AY)
*Çavkanî: MA