Ji bo nûçeya Tirkî / İngilîzî bitikîne
Polîsan li Hatayê operasyon birin ser gelek kesan ku Mîthat Can Serokê Komeleya Mafên Mirovan (İHD) a Hatayê jî di nava wan de ye. Canê 73 salî birin Beşa Têkoşîna li dijî Terorê ya Midûriyeta Emniyetê ya Hatayê.
Parêzer Hatîce Can Endama Lijneya Rûmetê ya İHDyê ji bianetê re diyar kir ku hevjînê wê Mîthat Can vê sibeyê di encama serdegirtina mala wan de hatiye desteserkirin û tenduristiya wî ne baş e:
“Dema ku telefon bikirana û ji bo îfadeyê bang li wî bikirana wê demildest biçûya. Ji bo kontrolên tenduristiyê wê vê hefteyê biçûya Stenbolê, vê gavê tê dermankirin. Em bi fikarin ku şert û mecrên desteserkirinê tenduristiya wî xirabtir bike.”
“Sedema operasyonê daxuyaniya derbarê Efrînê de ye”
Parêzer Canê destnîşan kir ku dozgeriyê biryara desteserkirinê ji bo 27 kesan derxistiye û di biryarê de li gel “endamtiya rêxistinê” “sûcên li hemberî dewletê” û hinên din hene.
Li gorî zanyariyên ku Hatîce Canê dane, sedema desteserkirinê daxuyaniya derbarê operasyona li ser Efrînê ye ku 22yê Kanûna Paşiyê li avahiya ÎHDyê ya li Hatayê hatibû kirin.
Parêzer Servet Akbaba Sekreterê İHDyê yê Hatayê, Yûsûf Berkyurek Serokê Sendîkaya DİSK Genel İşê yê, Kerem Nalbant û Sûltan Başaran Hevserokên HDPyê yên Hatayê, Çetîn Sakalli namzetê HDPyê yê hilbijartina 1yê Çiriya Paşiyê, Adnan Eryilmaz endamê Lijneya Rêveberiyê yê berê yê Baroya Hatayê, Gulîzar Işik û Nîdal Çay endamên Egitim Senê, Hulya Kavûk Hevseroka SYKPyê ya Hatayê, Dîlek Daban û Denîz Polat Seroka BESê ya Hatayê jî di nava kesên ku hatine desteserkirin de ne. (AS/FD)
* Fotograf: sendika.ogr
