Li Amedê bernameya bîranînê ji bo gerîlayên PKKê yên ku can dane pêk hat

Piştî nav û nasnavên gerîlayên PKKyê yên di dîrokên cuda û li deverên cuda can dane aşkere bûn, li Amed, Mêrdîn, Wan û Stenbolê bernameyên bîranînê hatin li dar xistin.

Bi pêşengtiya MEBYA-DERa Amedê de ji bo 49 gerilayên PKKê yên ku di dîrokên cuda de can dane, li Parka Koşuyoluyê ya Amedê şîn hate danîn. Malbaten gerilayan, parlamenterên DEM Partiyê endam û reveberên partiyên siyasî û nûnerên saziyên civakî tevlî bernameya bîranînê bûn. 

^{Konê sersaxiyê, Koşuyolûya Amedê. Fotograf: Ajansa Welat}

Li Amedê li ser maseyên di konê şînê de de hatine bi cihkirin fotografên 49 gerilayan  û gul hatin danîn. Gel bi girseyî bi diruşma “Şehîd Namirin” serdana şînê kirin.

Her wiha di heman demê de li navçeyên Farqîn, Bismil û Xana Axparê yên Amedê li 6 navendan konê şînê hatin danîn. Bernameya şînê 3 rojan berdewam kir.

Bakirhan serdana konê sersaxiyê kir

^{Konê sersaxiyê, Amed. Fotograf: Bilal Güldem} 

Hevserokê Giştî yê DEM Partiyê Turcer Bakirhan û heyeta pê re serdana konê şînê a li  Koşuyoluyê kirin û sersaxî ji malbatên gerilayan re xwestin.

Tûncer Bakirhan li kêleka malbatan rûnişt hestên malbatan parve kir û peyama piştevaniyê da.

Li  mala şinê a Taxa Huzurevleri a navçeya Peyas a Amedê ji bo cangoriyên di têkoşîna azadiyê de jiyana xwe ji dest dane şîn hate danîn. Hevserokê Giştî yê  DEM Partiyê Tuncer Bakirhan, Hevşaredarên Rezanê, Peyasê û Sûrê endam û rêveberên partiyê sîyasî, nûner saziyên sivîl û gelek welatî tevlî şînê bûn.

^{Konê sersaxiyê, Amed. Fotograf: Bilal Güldem} 

Li taxa Pornagê ya navçeya Xana Axpar a Amedê jî ji bo cangoriyan şîn hate danîn. Gelek welatiyan serdana şînê kir. Şîn dê 3 rojan berdewam bike.

Li Bismilê jî ji no gerilayan şîn hate danîn. Di seetên sibehê de gelek kesan serdana şîna ku li taxa Holahate danîn, kirin. Di şînê de wêneyên cangoriyan danîn maseyê û dua hatin xwendin.

Li gundê Kizlalê yê navçeya Farqînê ya Amedê, ji bo gerilayên ku di demên cuda de jiyana xwe ji dest dabûn şîn hate danîn. Li cihê şînê fotografên gerilayên PKKê hatin danîn.

Roja duyem a bernameyê de li Parka Koşuyoluyê posterê Abdullah Ocalan hate daliqandin.

^{Konê sersaxiyê, Parka Koşuyolûyê ya Amedê. Fotograf: Ajansa Welat}

Roja duyem a bernameyê de li Parka Koşuyoluyê posterê Abdullah Ocalan hate daliqandin.

^{Sûrên Amedê. Fotograf: Ajansa Welat}

Ciwanên Welatparêz ên Amedê posterê Abdullah Ocalan li ser sûrên Amedê daliqandin.

Li ser pankartê nivîsa “Pakrewan rûmeta me ne; Her şehîdek meşaleyeke, meşale tariyê ronî dike û rêya azadiyê nîşan dide. Şehîd namirin. Amed bi şehîdên xwe serbilind e.” hatiye nivîsandin.

^{Fotograf: Bilal Güldem / Amed}

Tevgera Jinên Azad (TJA) ji bo cangoriyên Tevgera Azadiyê ya Kurd ên di dîrokên cuda de jiyana xwe ji dest dane, li ser hesabê xwe yê medyaya civakî daxuyaniyeke belav kir û gerîla bi bîr anî.

^{Fotograf: Bilal Güldem / Amed}

Daxuyaniya TJAyê ji bo cangoriyan bi vî rengî ye:

“Di têkoşîna gelê kurd de, vegotin, bîranîn û veguhastina bîranîna şehîdên me yên ku li dijî êşên herî giran li ber xwe dane, êşên hevpar ên gelên me hildane ser milên xwe, di rêya lêgerîna heqîqet û azadiyê de têkoşîna herî dijwar dane û di rêya azadiyê de ji me re bûne ronahî, ji bo nifşên paşerojê yek ji erkên herî watedar û giran ên berpirsiyariya me ya şoreşgerî ye.

^{Fotograf: Bilal Güldem, Konê Şînê / Amed}

"Ne hêsan e ku mirov nirxên herî bilind ên jiyanê di nav hevokan û gotinan de bîne ziman. Her peyva ku hewl dide wan bide nasîn, bêguman bi aliyekî xwe ve kêm dimîne. Ji ber ku li hemberî fedakarî û dilsoziyeke wiha de dibe ku hêza peyv, qelem û vegotinê kêm bimîne. Têgihîştina rastiyê ku yek ji lêgerînên herî mezin ên mirovahiyê ye û jiyana ji bo wê, yek ji têkoşînên herî dijwar e."

^{Fotograf: Bilal Güldem, Konê Şînê / Amed}

"Dîroka partî û têkoşîna me bi berxwedan, fedakarî û şehadetên mezin ku vîn, hebûn û azadiya gel û neteweyekê mezin dikin re hatî hûnandin. Gotina “Jiyana rast, şehîd bi xwe ne” ew pîvan û rastiya jiyanê ya ku ji me re hiştine tîne ziman."

"Îro dema ku em hemû dijwarî û astengiyên li pêşiya xwe derbas dikin, em ji hêz û mîrasa têkoşînê ya ku şehîdên me ji me re hiştine sûd werdigirin. Hişmendî û bîra wan a zelal, berxwedana wan a giyanî, mezinahî, kûrahiya hest û ramanên wan, biryardarî û zelalbûna wan a di pratîkê de nirxên bingehîn in ku rê nîşanî me didin. Hêvî û hewldana ku wan hiştiye, yek ji çavkaniyên herî girîng e ku têkoşîna me mezin dike."

^{Fotograf: Bilal Güldem, Konê Şînê / Amed}

"Ew kesên ku jiyana xwe diyarî têkoşînê kirine, ne tenê jiyana xwe; bawerî, hêvî û hesreta xwe ya azadiyê jî danîne holê. Ji ber vê yekê jiyana wan bi wateyên herî bilind re bûne yek. Erka ku dikeve ser milê me ew e ku em li ser nirxên ku wan hiştine dilsoz bimînin, wateyeke rast biden têkoşîna wan û bibin peyvdarên herî bi hêz yên ku rastiya wan ji bo nifşên pêşerojê bigirin ser milê xwe."

"Şehîdên me ne tenê kesên ku di têkoşîneke paşerojê de jiyan kirine. Di jiyana wan de vîna azadî û serkeftina gelê me şênber bûye. Di serdemên herî giran de, di şert û mercên ku xiyanet û înkar kûr dibû de jî li ba rastiyê rawestiyan; dema ku hewce dikir bi tenê man û rastiyên ku dizaniyan parastin. Bi vê aliyê xwe ve ew ne tenê bi jiyana xwe ya kesane, di heman demê de bi nirxên ku temsîl dikin re parçeyek ji bîra hevpar û têkoşîna gelê me ne."

^{Fotograf: Bilal Güldem, Konê Şînê / Amed}

"Dema ku em şehîdên xwe vedibêjin em dizanin ku peyv û hêza me çiqas kêm dimîne. Lê belê ji bo zindîhiştina bîranîna wan, têgihîştina têkoşîna wan û veguhastina mîrasa wan a pêşerojê yek ji berpirsiyariya me ya herî bingehîn e. Em ê vîna ku wan di rêya azadî, rûmet û rastiyê de derxistiye holê zindî bihêlin û têkoşîna wan bigihêjînin pêşerojeke azad."

^{Fotograf: Bilal Güldem, Konê Şînê / Amed}

"Di vê têkoşîna watedar de em hemû şehîdên ku jiyana xwe ji dest dane bi rêzdarî û minetdarî bi bîr tînin; di serî de ji bo Rêber Apo, malbatên me yên welatparêz û xizmên wan, ji hemû gelê kurd ê ku êşên wan parve dikin re serxweşiyê dixwazin.”

(AY)