Lêgerîna edaletê ya Malbata Şenyaşar di roja 222emîn de ye

Hevjînê Emîne Şenyaşarê û du kurê wê ji aliye xizmên Îbrahîm Halîl Yildiz, parlamentere Rihayê yê AKPê ve hatibûn kuştin. Emîne Şenyaşar û kurê wê yê bi navê Ferît Şenyaşar ku ji êrişê bi brîndarî filitîbû, bi daxwaza dadkirina berpirsiyaran nobeta “edaletê” dabûn destpêkirin. Nobet di roja 222emîn de dewam dike.

Bixwîne- Malbata Şenyaşar: Dewlet bi qasî ku edîl be ewqas bihêz e

Bixwîne- Malbata Şenyaşar carekî din banga “bêdeng nemînin” kiriye

Bixwîne- Malbata Şenyaşar: Bila zilm bi dawî bibe

Li gorî nûçeya Ajansa Mezopotamyayê Ferît Şenyaşarê ku bi dayika xwe Emîne Şenyaşar re, li qada weke "goşeya edaletê ya malbata Şenyaşar" tê bi nav kirin dest bi nobetê kiriye.

Malbatê li ser hesabê xwe yê medya civakî peyamek belav kiriye û gotiye, “Heya ku maf, hiqûq û edalet pêk neyê, em ê têkoşîna xwe ya bênavber û bi biryardarî dewam bikin. Em ê bi hev re edaletê pêk bînin.”

 Çi bûbû?

Di 14ê Hezîrana 2018an de di dema xebatên hilbijartinê yê Îbrahîm Halîl Yildiz, parlamenterê Rihayê yê AKPê de êrişa çekdarî pêkhatibû. Di encama êrişê de Mehmet Şah Yildiz, birayê Îbrahîm Halîl Yildiz, Haci Esvet Şenyaşar û kurên wî Adil û Celal Şenyaşar miribûn.

Fadil Şenyaşarê ku di pevçûnê de bavê wî û herdu birayên wî candabûn û bi xwe jî brîndar bibû, li Nexweşxaneya Lêkolînê û Perwerdeyê ya Gazî Yaşargîl a Amedê hatibû desteserkirin û piştre dadgehê biryara girtina wî dabû.

(AY)