Kovara The Hall Kurdî dest weşanê kiriye. Kovar li Londonê, paytexta Ingilîstanê tê amadekirin. Rojnameger Erol Başak û Dr. Osman Komurcu weşangerên kovarê ne.
The Hall Kurdî Kovareke aktuel ya çandî ye. Weke kovareke dîjîtal mehê carekê dê bê belavkirin. Tê de ji nûçeyan bigrin, heya rûdanên li cîhanê, hevpeyvîn, gotar, tendirûstî, jin, wêje, sînema hwd. gelek mijar wê hebin.
Di hejmara yekem a kovarê de mijara sereke rewşa koçberan a li ser sînorê Poland û Belarûsê ye. Her weha tundiya li ser jinan, hevpeyvîna bi dersdara dersa kurdî Dîlan Çelîker û hevpeyvîna bi rayedarên Kurdish House Londonê re çendîn mijarên din in.
Ekîba damezrêner a kovarê bi van gotinan behsa mebest û armancên xwe kirine: “Wek malbata The Hall Kurdiyê, em dixwazin li Britanya û nexasim li Londonê bibin deng û awazê kurdan. Lewra London bajarekî qedîm e û li cîhanê paytext û navendeke sereke ye. Her wiha bi hezaran Kurd lê dijîn.”
Heta niha bi ingilîzî û tirkî dihate weşandin
Kovar beriya niha bi navê The Hall û bi zimanê ingilîzî û tirkî ev 2 sal in dihate weşandin. Ekîbê biryar daye ku bi naverokeke cuda û serbixwe The Hall Kurdî derxe.
Edîtoriya Kovarê sedema hilbijartina navê Hallê bi van gotinan aşkere kiriye: “Hall, bi Kurdî eywan e. Ji salonên mezin û fireh ku çalakiyên wekî konsert, semînêr lê tê dayîn re jî hall tê gotin. Bi her du awayî jî Hall cihê ku mirov ji bo armancekê li hev dicivin e. Di çanda kurdî de jî li gundan eywan cihê bêhnvedanê ye. Her wisa civat li eywanan kom dibe. Kovara me jî dê bibe wek eywanekê ku her kes bikare ji xwe re tê de cihekî bibîne û ji her aliyê cihanê geşedanan, serpêhatiyan, nûçeyan ku Kurdan eleqedar dikin berhev bike û bigihîne xwînerên Kurdî.”
The Hall Kurdî li ser du platforman belav dibe. Ji wan yek issuu.com ya din jî epirtuk.com e.
https://issuu.com/thehallnews/docs/the_hall_fi_nal_kurdi
https://epirtuk.com/260-thehall
(FD)
