Duh (28ê Tîrmehê) danê êvarê li navenda Colemêrgê di serdegirtina polîsan a li dawetekê de 3 muzîkjen û xwediyê dawetê hatin desteserkirin.
Polîsan serê sibê 2 muzîkjenên ku beşdarî heman dawetê bûn in ji malên wan ew desteser kirin.
Xwediyê dawetê yê ku hatibû desteserkirin îro danê nîvro piştî îfadeya wî hat berdan; çar endamên komê bi daxwaza girtinê şandin dadgehê û yek jî bi şertê kontrola edlî serbest bû .
Stranên Kurdî yên bi navê “Keçe Kurdan” û “Şervano” ku muzîkjenan gotine weke sedema desteserkirina wan hate nîşandan.
Endamê Şaxa Komeleya Hiqûqnasên Ji bo Azadiyê (OHD) ya Colemêrgê Azad Ozer ji bianetê re axivî û diyar kir ku li Colemêrgê di dawetan de ji bilî kurdî ti stranên bi zimanên din nayên gotin.
Ozer, anî ziman ku stranên ku bûye mijara sûcdarkirinê di dawetên ku polîs, dozger û dadger beşdar bûne de jî hatine gotin û wiha got:
"Dawetên ku li Colemêrgê yên ku polîs, dozger û dadger beşdar dibin, di televîzyona dewletê de tên nîşandan. Stranên ku di hemû dawetan de tên strandin, êdî weke sûc tên nirxandin. Eger sûc be, ev kesên ku dewletê temsîl dikin jî hevkarên sûc in. Lê belê rewş weha nîne, dibêje 'Dema ez bixwazim qedexe dikim, dema ez bixwazim berdidim.' Heta niha li tu dawetekê de ji ber strana kes nehatiye desteserkirin.
Ozer, diyar kir ku di hilbijartina 31ê Adarê de jî ji ber strana "Le Amedê" li buroya hilbijartinê ya DEM Partiyê hatibû lêxistin, 2 rêveber hatin desteserkirin û got, "Ji rêveberan yek beraat bû û yê din jî di propagandayê de hat cezakirin. Ev ceza wê bê betalkirin. Di vê mijarê de biryarên Dadgeha Bilind û Destûra Bingehîn hene."
Canan: Sirûdên Filistînê jî wê bên qedexekirin?
Serokê Baroya Colemêrgê Ergûn Canan jî Qanûna Têkoşîna Li Dijî Terorê ya Bi Hejmar 3713ê bi bîr xist û wiha got:
"TMK hatibû guhertin, lê eşkere ye ku feraset nayê guhertin. Li gorî qanûnê; Ji bo ku kiryar weke sûc bê dîtin, divê rêbazên bihêz, tûndkarî û gef hatibe bikaranîn û di heman demê de ji bo pergala giştî jî bibe xetere.
"Çi bû îro hawirdoreke wisa hatiye afirandin û li pişt wê dê çi bên, divê ev were pirsîn. Ev qedexe, desteserkirin û zext ji bo aştiya civakî gef e. Sûcê rast ev e."
Di dawiyê de Canan amaje bi sirûdên berxwedanê yên Filistînê kir û got, "Gelo gotin û guhdarîkirina sirûdên berxwedana Filistînê wê bibe sûc?"
(RT/AY)
