Di 7ê Kanûna Paşiya 2013an de li kana girêdayê Rêvebiriya Dezgeha Kozlûyê ya Saziya Komira Kevirî ya Tirkiyeyê (TTK) di encama teqîna gaza metanê de 8 karkerên madenê miribûn. Îro ji bo wan karkeran merasîmeke bîranînê hat lidarxistin.
Li gorî nûçeya Ajansa Anadolûyê, di merasimê de karkeran Quran xwendin û ji bo karkerên dua kirin.
Sekreterê Giştî yê Darayî yê Sendîkaya Karkerên Madenê ya Giştî (GMÎS) Yalçin Yîgît, Sekreterê Teşkîlata Giştî û Perwerdeyê ya GMÎSê Tayfun Demîr, rêveberên sendîkayan û karkerên madenê beşdarî bîranînê bûn.
Di encama teqîna gaza metanê de 8 karkerên madenê yên bi navê Huseyîn Kurekçî, Hasan Bozacıoglu, Muharrem Yapıcı, Yuksel Koca, Ahmet Şeker, Koksal Kadioglu, Muhsin Akyuz û Satilmiş Arslan miribûn.
Pêvajoya dozê
Piştî teqînê ji aliyê Serdozgeriya Komarî ya Zonguldakê ve lêpirsîn hat destpêkirin. Di çarçoveya lêpirsînê de rêveberên girêdayî TTKê û nûnerên şîrketa taşeron jî di nav de bi giştî li 11 kesan doz hat vekirin.
Doza ku li 1emîn Dadgeha Cezayê Giran a Zonguldakê pêk dihat bi salan dewam kir.
Di sala 2017an de dadgehê cezayê girtîgehê li 5 bersûcan birî. Lêbelê, piraniya cezayên hat birîn veguherandin cezayê pereyî an jî taloq kirin.
(TY/AY)
