Cîgirê Serokê MHPê Feti Yıldız beriya civîna yekem a komîsyona "pêvajoyê" ya ku piştî biryara PKKê ya danîna çekan li Meclîsê hat damezrandin, daxuyaniyek da.
Fetî Yildiz, îro beriya civîna yekem li ser hesabê xwe yê medyaya civakî peyamek belav kir.
Yildiz di peyama xwe de wiha got:
“Pêşketinên ku 1ê Çiriya Pêşîn a 2024an bi meşa Serokê me yê Giştî birêz Devlet Bahçelî ya ber bi rêzên DEM Partiyê ve li parlamentoyê dest pê kir û destê hevserok û parlamenteran girt, veguherî pêvajoyeke siyasî ya ku gav bi gav berdewam kir û piştre jî bû projeyeke dewletê ku di encamê de PKKyê xwe fesih kir û dest bi radestkirina çekan kir.
'Komîsyona Yekîtî û Hevgirtina Niştimanî' dê îro civîna xwe ya yekemîn li dar bixe. Pêdivî bi helwesteke wisa heye ku partiyên siyasî hevdu wekî dijmin nebînin û têgihiştina xwe ya siyasî li gorî vê yekê ava bikin.
Derfeteke me ya mezin heye ku em belaya terorê ya ku enerjiya welatê me dimije û xerciyeke wê ya civakî ya zêde heye, biavêjin sergoyê dîrokê.
Di vê komîsyonê de erkê me ew e ku em bi diyarkirina xalên hevpar ên nêrînên cuda, ji bo çareserkirina pirsgirêkên Tirkiyeyeke bêteror, çareseriyên hevpar bibînin. Ew berpirsyariya xwe ya li hemberî leşker, polîs, cerdevan, mamoste û leşkerên hatine kuştin dizanin.
(RT/AY)
