Di çarçoveya lêpirsîna Serdozgeriya Komarî ya Stenbolê de, nivîskarên Kurd Mevlut Aykoç, Samî Tan û Ronayî Onen bi hinceta pirtûka Hînker a di sala 2010an de çap kiribûn hatin desteserkirin.
Li gorî nûçeya Yenî Yaşamê, Mevlıt Aykoç danê sibê li Stenbolê, Samî Tan li Rihayê û Ronayi Onen li Amedê di serdegirtina malan de hatin desteserkirin. Her wiha îfadeya Serokê Komeleya Ziman û Çanda Kurdî ya Rihayê Samî Tan ku li Emniyeta Rihayê tê girtin bi fermanê hate girtin.
Nivîskarên Kurd bi “endamtiya rêxistinê” tên sûcdarkirin. Ji nivîskaran sedema nivîsandina asta sêyemîn a "Hînker"ê hatiye pirsîn.
Hînker di sala 2010an de ji aliyê Ronahi Onen, Mevlut Aykoç, Samî Tan û Mehmet Sadık Varli re hatiye amadekirin û Enstîtuya Kurdî 3 caran di sala 2010, 2011 û 2012an de çap kiriye.
Her weha destûra yasayî û wêneyên kes û cihên ku di Hînkerê de ne ji nivîskaran hatiye pirsîn.
DEM Partiyê daxuyanî da
Navenda Giştî ya DEM Partiyê bi daxuyaniyekê desteserkirina nivîskarên Kurd Onen, Tan û Aykoç bi hinceta pirtûkên wan ên dersa Kurdî rexne kir.
DEM Partiyê di daxuyaniya xwe ya li ser Xê hatiye weşandin de wiha got: “Li Tirkiyeyê bi ‘Banga Aştî û Civaka Demokratîk’ a dîrokî ve qonaxeke nû heye û di vê qonaxê de di şexsê Ronahî Onen, Samî Tan û Mewlût Aykoç de ev êrîşên ne demokratîk û nehiqûqî yên li dijî kedkarên zimanê kurdî nayên qebûlkirin.
"Armanca van operasyonan têkbirina hêviyên aştiyê ye. Divê hikûmet û daraza di bin kontrola wê de demildest dawî li van êrîşan bîne. Divê kesên hatine desteserkirin serbest bên berdan û divê gavên demokratîkbûnê yên civak li bendê ne, bi lezgînî bên avêtin."
(AEK/AY)
