Artêşa Îsraîlê tesîsên nukleerî û baregehên leşkerî yên Îranê bombebaran kirin.
Li gorî nûçeya AAyê, ajansa fermî ya nûçeyan a Îranê IRNAyê di nûçeya xwe de têkildarî êrişê gotiye ku dengê teqînan bi taybetî ji rojhilat, rojava û navenda Tehranê tê bihîstin.
Li gorî medyaya Iranê di êrîşên li ser wargehên sivîlan ên li Tehranê de 5 kes mirin û 20 kes jî birîndar bûn. Her weha li Tebrîzê jî 2 kes mirine û 6 kes jî birîndar bûne.
Medyaya Îranê ragihand ku Fermandarê Giştî yê Supaya Pasdaran Husên Selamî û Serokê berê yê Rêxistina Enerjiya Atomî Fereydûn Ebasî hatine kuştin.
Her weha hat ragihandin ku Sererkanê Giştî yê Îranê Mihemed Baqirî jî di êrişê de hatiye kuştin.
Berpirs û fermandarên Îranê yên ku di êrişa Îsraîlê de hatin kuştin:
"Fermandarê Giştî yê Supaya Pasdaran Husên Selamî, Fermandarê Biryargeha Navendî ya Xatemul Enbiya Xulam Elî Reşîd, Serokê Zanîngeha Azad Mihemed Mehdî Tehrançî, Serokê berê yê Rêxistina Enerjiya Atomî ya Îranê Fereydûn Ebasî."
Îsraîlê êrîşî bajarê Tebrîz û Kirmaşanê jî kir
Televîzyona dewletê ya Îranê ragihand ku Îsraîlê li tesîsên nukleerî yên li Natanz, Tehran û Tebrîzê, û her weha li hin xalên li Kirmaşanê jî xistiye.
Heta niha derbarê ziyanên canî û malî de ti daxuyaniyek fermî nehatiye dayîn.
Wêneyên ku li ser medyaya civakî hatine parvekirin nîşan didin ku ji hin deverên Kirmaşanê dûman bilind dibe.
Hat diyarkirin ku tesîsa nukleerî ya Natanzê hatiye armanckirin lê tu derz çênebûne.
"Sepahnews"ê ku bi nêzîkbûna xwe ya bi Pasdarên Şoreşa Îranê re tê zanîn, ragihand ku Îsraîlê 5 xal li bajarê Tebrîzê hedef girtine.
Heta niha derbarê windahiyên can û mal di êrîşê de ti daxuyaniyek fermî nehatiye dayîn.
Berdevkê Fermandariya Giştî ya Îranê Şikarçî: Ew ê berdêlên giran bidin
Şikarçî di axaftina xwe de ji televîzyona dewletê ya Îranê re êrîşên Îsraîlê yên li ser welatê xwe nirxand.
Şikarçî got, "Îsraîlê êrîşên xwe yên li ser Îranê bi alîkariya Amerîkayê pêk anîn. Ew ê berdêlên giran bidin. Divê ew li bendê bin ku hêzên çekdar ên Îranê bersivek tund bidin."
Rayedarê Îranî diyar kir ku di êrîşa Îsraîlê de hin fermandaran jiyana xwe ji dest dane.
Televîzyona dewletê ya Îranê: Baqirî mir
Televîzyona dewletê ya Îranê ragihand ku Îsraîlê êrîşek li ser Serfermandarê Giştî Mihemed Baqirî pêk aniye.
Hat ragihandin ku di êrîşê de Serfermandarê Giştî Baqirî hatiye kuştin.
Wezîrê Parastinê yê Îsraîlê Katz daxuyanî da
Wezîrê Parastinê yê Îsraîlê Yisrael Katz ragihand ku wan dest bi êrişeke li dijî Îranê kiriye û rewşa awarte ragihandiye.
Serokwezîrê Îsraîlê Benjamin Netanyahu ragihand ku wan bi operasyoneke bi navê “Şêrê ku bilind dibe” êrişî navendên bernameya dewlemendkirina nukleer a Îranê kiriye.
Netanyahu da zanîn ku armanca wan tesîsa sereke ya dewlemendkirinê ya li Natanzê ye û ragihand, “Heta ku metirsî were rakirin êriş dê berdewam bikin.”
Hêzên Parastinê yên Îsraîlê (IDF) ragihand ku wan dest bi “êrişeke pêşwext, birêkûpêk û hevaheng” li dijî bernameya nukleerî ya Îranê kiriye.
Hat diyarkirin ku bi dehan balafirên şer beşdarî operasyonê bûne.
Daxuyaniya Amerîkayê
Wezîrê Karên Derve yê Amerîkayê Marco Rubio ragihand ku ew beşdarî êrişê nebûne û got:
“Îsraîlê ev gav ji bo parastina xwe avêt.”
Rubio hişyarî da Îranê û anî ziman, “Divê berjewendî an jî karmendên Amerîkayê nekin armanc.”
Rêyên hewayî yên Îranê hat girtin
Rêvebirê Têkiliyên Giştî yê Desteya Hewayî ya Sivîl Mehdî Ramazanî ragihand ku rêyên hewayî ya welêt heta agahdariyeke din hatiye girtin.
Iraqê rêyên hewayî ji bo hemû geştan girt
Piştî êrîşa Îsraîlê ya li ser Îranê, Iraqê qada hewayî ya xwe ji bo hemû geştan girt.
Li gorî ajansa nûçeyan a fermî ya Iraqê INAyê, Wezareta Veguhestinê ya Iraqê qada hewayî ya welêt girtiye û geştên li hemû balafirgehan sekinandiye.
Tedbîrên li herêmê
Hemû firîn ên li balafirgehên Tehranê hatin sekinandin, Îraqê jî asmanê xwe ji hemû firînan re girt. Asmanê Îsraîlê jî heta daxuyaniyeke din hat girtin.
Piştî êrişan, petrolê zêdetirî ji sedî 7 biha bû.
Bihayê petrolê ya Brent gihîşt 74,49 dolaran, petrolê WTI jî gihîşt 73,39 dolaran.
Televîzyona dewletê ya Îranê îdia kir ku Îsraîlê li Tehranê deverên şêniyên sivîl jî bombebaran kirin.
(VC/AY)
Kaynak: AA, Press TV, IRNA, Rudaw
