Îsraîlê agirbest bidawî kir û êrişî Xezeyê kir: Herî kêm 404 kes mirin

Artêşa Îsraîlê ragihand ku îro li gorî saeta herêmî saet 02:30an de dîsa dest bi êrîşên li ser Xeta Xezeyê kirine.

Berdevkê Artêşa Îsraîlê Avichay Adraee di daxuyaniya xwe ya li ser platforma Xê de ragihand ku artêşa Îsraîlê li ser Xezeyê êrişên berfireh pêk anîne. Adraee da zanîn ku êrîş li gorî fermanên siyasî hatine kirin û wan li hedefên Hamasê dane.

Qesra Spî piştrast kir ku Îsraîlê ji bo êrişan DYA agahdar kir. Îsraîlê ragihand ku li Xezeyê dibistan hatine rawestandin û destûr nayê dayîn ku cotkar li nêzî sînor bixebitin.

Herî kêm 404 kes mirin

Li gorî nûçeya Ajansa Anadoluyê, Ofîsa Medyayê ya Hikûmetê ya li Xezeyê daxuyaniyek nivîskî daye û gotiye ku Îsraîlê peymana agirbesta li Xezeyê tunehesibandiye û hemû peymanên navneteweyî û mirovî binpê kiriye û qirkirina sivîlan didomîne.

Li gorî daxuyaniya Wezareta Tenduristiyê ya li Xezeyê ku di saet 13:10an de li ser kanala fermî ya Telegramê ya Xezeyê hat dayîn, hejmara kesên ku di êrîş û qetlîamên ku ji saetên danê sibê vir ve ji aliyê artêşa Îsraîlê ve li Xeta Xezeyê tên kirin de mirine derket 404an û ya birîndaran jî derket 562an.

Di daxuyaniyê de hat ragihandin ku hê jî gelek kes di bin xirbeyan de mane û ekîp xebatên xwe yên lêgerîn û rizgarkirinê didomînin.

Hat diyarkirin ku hin ji kuştî û birîndaran rakirin nexweşxaneyan, lê ji ber rewşa nebaş a mirovî ya li herêmê û kêmbûna sotemeniyê ku çûnûhatina hemû bajaran asteng kiriye û piraniya kuştî û windayan jin, zarok û extiyar in.

Di nûçeyê de hatiye gotin ku cenazeyên zêdeyî 15 kesên ku di êrîşên Îsraîlê yên li ser Xezeyê de jiyana xwe ji dest dan û zêdeyî 20 birîndaran gihîştine nexweşxaneyan û cenazeyên 14 kesan û zêdeyî 70 birîndaran jî birine Nexweşxaneya Avde ya li Kampa Penaberan a Nusayrat a li navenda Xezeyê.

Her wiha hat ragihandin ku cenazeyên 8 Filistîniyan ku 6 jê zarok in û gelek birîndar jî rakirine Nexweşxaneya Avdê.

Li gor nûçeya AAyê Îsraîlê ragihandiye ku wan plan kiriye êrîşên xwe zêde bikin. Serokwezîr Benjamin Netanyahu ragihand ku wî ferman daye ku li dijî Hamasê li Xezeyê êrişên xurt were kirin.

Hamasê gotiye ku Îsraîlê agirbest betal kir, dîsa dest bi şer kir û her weha ji bo midaxeleyê bang li welatên Ereb û Neteweyên Yekbûyî  kir û Netanyahu ji êrîşên hovane ên li dijî gelê Filistînê weke berpirsyar nîşan da.

Hamasê diyar kir ku hikûmeta Îsraîlê peymana agirbestê ya ku di 19ê Kanûna Paşiyê de ket meriyetê bi dawî kir û li dijî Xezeyê şer ragihand û got, "Netanyahu û hikûmeta wî jiyana dilgirtiyan dixe xeteriyê û rewşa wan dikişîne nava nediyariyê."

Agirbest û bertek

Hamasê destnîşan kir ku Îsraîlê agirbest binpê kiriye û bang li welatên Ereb û Teşkîlata Hevkariya Îslamî kir ku berpirsyariya xwe bi cih bînin.

Di 7ê Cotmeha 2023an de şer û pevçûnan dest pê kir û 15 mehan dewam kir. Di encamê de zêdetirî 46 hezar Filistînî û hezar û 100 Îsraîlî mirin. Her wiha di van pevçûnan de zêdetirî 12 hezar û 300 zarok jî mirin.

Peymana dawî ya agirbestê di 19ê Kanûna Paşiya 2025an de ket meriyetê. Di çarçoveya agirbestê de pevguhertina dîlgirtiyan pêk hat û bi giştî 5 dilgirtî pev guhertin. Guhertina dawî di Sibata 2025an de bû ku Hamas sê rehîneyên lsraîlî serbest berdan.

(EMK/VC/AY)