Wezareta Karên Derve ya Îsraîlê saet di 03:00an de ragihand ku mafparêzên ku di keştiya "Madleen"ê de bûn û hatibûn desteserkirin, ji bo ku werin dersînorkirin birine balafirgeha Tel Avîvê. Mafparêzan ji bo alîkariya mirovî bigihîne Xezeya dorpêçkirî bi keştiya bi navê “Madleen”ê bi rê ketibûn.
Keştiya Koalîsyona Fîloya Azadiyê roja Duşemê ji aliyê hêzên Îsraîlê ve hate rawestandin û 12 mafparêz ên di keştiyê de bûn ji aliyê komandoyên deryayî yên Îsraîlê ve hatin desteserkirin.
Tê payîn ku mafparêz ji Balafirgeha Ben Gurion vegerin welatên xwe.
Revandina keştiya Madleenê li Îsraîlê hate protestokirin
Rêwiyên "Keştiya Selfieyê"
Daxuyaniya wezaretê wiha ye:
Rêwiyên "Keştiya Selfieyê" gihîştin Balafirgeha Ben Gurion da ku ji Îsraîlê derkevin û vegerin welatên xwe. Tê payîn ku hin ji rêwiyan di çend saetên pêş de ji welêt derkevin.
Kesên ku belgeyên dersînorkirinê îmze nekin û ji Îsraîlê dernekevin, dê derkevin pêşberî dadgehan da ku prosedurên dersînorkirina wan li gorî qanûna Îsraîlê werin pejirandin. Konsulên welatên ku rêwî welatiyên wan in jî li balafirgehê hatin cem rêwiyan."
"Alavên alîkariyê xespkirin"
Koalîsyona Fîloya Azadiyê di derdora saet 03:00ê sibehê de daxuyanî da û diyar kir ku Îsraîl qanûna navneteweyî binpê dike û weha hatiye gotin:
"Me piştrast kir ku her 12 xwebexşên keştiya 'Madleen'ê niha li Bendera Aşdodê ne. Ew di bin çavdêriya rayedarên Îsraîlê de ne û prosedurên wan berdewam dikin. Ger ew razî nebin ku tavilê welêt biterikînin, tê payîn ku ew ji bo navenda desteserkirinê ya li Ramleyê ye, werin veguheztin.
"Ger ew razî bibin, dibe ku destûr bê dayîn îşev ji Tel Avîvê bi balafirê vegerin welatên xwe. Em daxwaza xwe ya ji bo berdana xwebexşan û vegerandina alavên alîkariyê yên hatine xespkirin berdewam dikin. Ev desteserkirin neqanûnî ye û binpêkirineke eşkere ya qanûna navneteweyî ye."
Xwebexşên di keştiya Madleenê de bûn ji aliyê artêşa Îsraîlê ve hatin revandin
12 aktîvîstên ku di keştiyê de bûn ev in:
Endama Parlamentoya Ewropayê (PE) ya Fransî Rima Hassan û welatiya Almanyayê Yasemin Acar, ji Tirkiyeyê Huseyin Şuayb Ordu, ji Brezîlyayê Thiago Avila, Sergio Toribio ji Spanyayê, Marco van Rennes ji Hollandayê, Baptiste Andre, Reva Viard, Pascal Maurieras û Yanis Mhamdi ji Fransayê, çalakvana avhewayê ya Swêdî Greta Thunberg û rojnameger Omar Faiad(El Cezire).
Çi bûbû?
Keştiya Madleenê ya 18 metreyî di 1ê Hezîranê de ji Bendera San Giovanni Li Cuti ya li bajarê Kataniayê ji bo Xezeyê bi rê ketibû.
Berdevkê Artêşa Îsraîlê Effie Defrin di daxuyaniyek çapemeniyê de got ku ew li dijî keştiya ku alîkariya mirovî dibe Xezeyê amadekariyê dikin.
Di 2ê Gulanê de keştiya Koalîsyona Fîloya Azadiyê ya bi navê “Conscience” li peravên Maltayê rastî êrişa dronan hatibû.
(TY/AY)
