Berdevkê Wezareta Karên Derve ya Îranê Îsmaîl Bakeyî ragihand ku ew dê di demeke nêzîk de ji bo peymana nukleerî pêşniyara xwe pêşkêşî Dewletên Yekbûyî yên Amerîkayê(DYA) bikin.
Li gorî nûçeya Rûdawê Berdevkê Wezareta Karên Derve ya Îranê Îsmaîl Bakeyî destnîşan kiriye û gotiye:
"Em dê di demeke nêzîk de plana xwe ya pêşniyazkirî ya ji bo rêkeftina atomî bi rêya Umanê radestî aliyê beramber (DYA) bikin."
Li gorî gotina Îsmaîl Beqayî pêşniyaza wan "guncav e û hevsengî tê de tê parastin.”
Beqayî diyar kir ku di pêşniyaza Amerîkayê de “tiştên ne zelal” hene lê xwest Amerîkayê ku "sûdê ji vê derfetê” wergire û got:
"Welatê me pêşniyara Amerîkayê qebûl nake û em dê pêşniyareke nû bidin Amerîkayê û em dixwazin ku vê derfetê bilind binirxîne. Bi dilniyayî di berjewendiya Amerîkayê de ye ku vê pêşniyarê bi awayê cidî li ber çavan bigire."
Îran û Amerîkayê 23yê Gulanê, pêncemîn gera dan û standinan li Romayê temam kir û wan ragihand ku dê "di paşerojeke nêzîk de" dest bi gera şeşemîn bikin lê heta niha dem û cihê wê ne diyar e.
Îran û Dewletên Yekbûyî yên Emerîkayê bi rêya Ûmmanê ji meha Nîsanê ve pênc tûrên danûstandinan kir. Lê belê herdu alî di mijara dewlemendkirina ûranyûmê de xwedî fikrê cuda ne. DYE ji Îranê dixwaze ku vî karê xwe bi temamî rawestîne, Tehran jî diyar dike ku di çarçoveya Peymana Pêşîgirtina li Belavbûna Çekên Nukleerî (NPT) de xwedî vî mafî ye.
Bi dehan dezgehên girîng ên aboriya Îranê, di nav wan de Banka Navendî û şirketa neteweyî ya neftê ji sala 2018an ve ketine lîsteya dorpêçên Amerîkayê. Li gorî Washingtonê sedema wê jî "piştgirîkirina terorê û belavkirina çekan e."
Ji dema ku Trump vegeriyaye Koşka Spî ve siyaseta "zexta herî zêde" li ser Îranê dîsa sepandiye û gefên bikaranîna çalakiyên leşkerî jî dike.
(AY)
