Şaxa Komeleya Mafên Mirovan (ÎHD) a Amedê bi boneya 1ê Îlonê Roja Aştiyê ya Cîhanê li ber Bîrdariya Mafên Mirovan a Parka Koşuyoluyê ya navçeya Rezan a Amedê daxuyanî daye.
Parlamentera Partiya Çepên Kesk a Amedê Adalet Kaya, Hevserokên Partiya Demokrat a Gelan (HDP) a Amedê Gulistan Atasoy û Zeyad Ceylan, Meclisa Dayikên Aştiyê, Seroka Odeya Bijîşkan a Amedê Elîf Tûran, nûnerên Baroya Amedê û Komeleya Hiqûqnasên ji bo Azadiyê (OHD) tev li daxuyaniyê bûne.
Daxuyanî ji aliyê Serokê Şaxa ÎHDa Amedê Ercan Yilmaz ve hatiye xwendin. Yilmaz, bi bîr xistiye ku Almanyayê di 1ê îlonê de Polonya dagir kiriye û Şerê Duyemîn ê Cîhanê dest pê kiriye. Yilmaz, daye zanîn ku li seranserî cîhanê bi milyonan kesên li dijî şer 1ê Îlonê weke Roja Aştiyê ya Cîhanê ragihandin.
Yilmaz, wiha domandiye: “Weke ÎHDê ji bo me tişta bingehîn; aştiyeke li ser esasên maf û azadiyan e. Di îro de ku em roja aştiyê pîroz dikin de jî li gelek deverên cîhanê şer û pevçûn hene. Dagirkeriya Rûsyayê ya li Ûkrayanê dibe sedema êş û azarên mezin. Her wiha şerên navxweyî yên li Lîbya û Sûriyeyê dibin sedema koçberiya bi milyonan kesan. Li hêla din israra Tirkiyeyê ya di neçareserkirina pirsgirêka kurd de jî her sal dibe sedema mirina bi sedan kesan.”
“Kurd ji ber fikrên xwe tên girtin û sirgûnkirin”
Yilmaz, axaftina xwe wiha bi dawî kiriye: “Domandina şer û pevçûnan ji hêla dewletê ve zextekî giran li civakê dike. Li Tirkiyeyê azadiya xwebirêxistinkirinê û mafê xweîfadekirinê di bin zexteke giran de ye. Niha gelek kes ji ber anîna ziman a fikrên xwe bi cezayên giran tên cezakirin û dikevin girtîgehan. Bi taybetî siyasetmedarên kurd, parêzvanên mafên mirovan, rojnameger û hunermendên kurd tenê ji ber ku ji dewletê cuda difikirin an tên girtin an jî neçar dimînin ku welatê xwe biterikînin. Weke parêzvanên mafên mirovan em careke din bi boneya 1’ê Îlonê Roja Aştiyê ya Cîhanê daxwaza xwe ya aştiyê tînin ziman û bang li hikûmetê dikin ku ji bo zimanê nefretê yê li civakê tê ferzkirin bi dawî bibe, polîtîkayên aştiyane yên li ser esasê mafên mirovan bimeşîne û dev ji polîtîkaya tecrîdê ya ku Tirkiyeyê li ser aştiya civakî dide meşandin berde.”
(AY)
*Çavkanî: Ajansa Mezopotamyayê
