Kedkarên çand û hunerê têkildarî banga “Aştî û Civaka Demokratîk” a Rêberê PKKê Abdullah Ocalan, li Komeleya Çand Hunerê ya Dîcle Firatê daxuyanî dan.
Li gorî nûçeya Ajansa Mezopotamyayê gelek hunermend tev li daxuyaniyê bûn. Kurdiya daxuyaniyê şanoger Omer Şahîn û Tirkiya wê jî wênesaz Neşe Toprakê xwend.
Ji Abdullah Ocalan banga ‘Aştî û Civaka Demokratîk’
“Em Banga Sedsalê bi qîmet dibînin”
Omer Şahîn, diyar kir ku ew weke hunermendên ku bi hêza hunerê bawer in û armanca wan aştiya civakî ye, piştgiriyê didin banga “Aştî û Civaka Demokratîk” a Rêberê PKKê Abdullah Ocalan a di 27’ê Sibatê de.
Şahîn, wiha domand: “Huner ziman û wijdanê gelan e. Em hunermend in ku berhemên ku êşa mirovan sivik dikin, hêviyên wan mezin dikin û daxwazên wan ên azadiyê diyar dikin derdixin holê. Ji ber vê yekê em Bangawaziya Sedsalê ya ji bo rawestandina şer, pevçûn û dubendiya civakî bi qîmet dibînin. Em banga aştî û civaka demokratîk a ji aliyê Birêz Abdullah Ocalan ve hatiye destpêkirin xwedî derdikevin.”
BANGA OCALAN
Kurdan li ser banga Ocalan çi got?
Di berdewamê de Şahîn bi lêv kir ku avakirina pergala civakî ya demokratîk ku li ser rêgezên azadî, wekhevî û dadê hatiye avakirin, berpirsyariya wan hemûyan e û wiha pê de çû:
“Em weke hunermend di vê pêvajoyê de bi rola xwe dizanin û ji gelê xwe re radigihînin ku em amade ne bi hemû hêza xwe ya hunerê re ji bo civakîkirina aştiyê erka xwe pêk bînin.”
“Ji bo civakek demokratîk em ê têkoşîna xwe bidomînin”
Şahîn, wiha bi dawî kir:
“Di vê pêvajoyê de em careke din diyar dikin ku divê hikûmet bi hesasiyeta birêz Ocalan a ji aştiyê re bi heman hesasiyetê nêzîk bibe. Û wek yek ji muxatabên vê bangê em berpirsyariya bingehîn a dewletê tînin bîra wê. Em girîngiyê didin bingeha hiqûqî û siyasî ya ku birêz Ocalan destnîşan kiriye. Em dizanin ku tenê li ser wê zemînê em hunermendên Kurd dikarin bi azadî huner, ziman û çanda xwe bijîn. Di vê çarçoveyê de em bang li hemû aliyên civakê dikin ku perspektîfa Aştî û Civaka Demokratîk a ku birêz Abdullah Ocalan aşkera kiriye; bi berpirsyarî rabin. Em ji bo dahatuyeke azad a ku di nava aştiyek bi rûmet de geş dibe li vir in û heta avakirina civakek demokratîk em ê têkoşîna xwe bidomînin.”
Çi bûbû?
Rêberê PKKê Abdullah Ocalan di 23ê Cotmeha 2024an de di çarçoveya hevdîtina malbatê de piştî 43 mehan cara yekemîn bi biraziyê xwe Omer Ocalan, Parlamenterê DEM Partiyê yê Rihayê re hevdîtin kir. Ocalan di hevdîtinê de destnîşan kiribû ku tecrîda li ser wî didome û weha gotibû, "Ger şert û merc çêbibin, hêza min a teorîk û pratîkî heye ku vê pêvajoyê ji zemîna pevçûn û tundiyê derxînim ser qada hiqûqî û siyasî."
Piştî hevdîtinê Buroya Hiqûqê ya Sedsalê ragihand ku di 6ê Mijdara 2024an de 6 meh cezayê nû yê qedexekirina hevdîtinê li Ocalan hatiye birin.
Serokê Giştî yê MHPê Devlet Bahçelî di civîna koma partiya xwe ya 26ê Mijdarê de got, "Em li bendê ne ku di navbera Îmraliyê û koma DEMê de rû bi rû hevdîtin bên kirin."
Hevserokê Giştî yê DEM Partiyê Tuncer Bakirhan bersiva banga Bahçelî da û got, "Em weke hevserok dixwazin biçin hevdîtinê bi Birêz Ocalan re bike û tevkariyê li aştiya vî welatî bikin."
DEM Partiyê ji bo bi Ocalan re hevdîtinê bike heman rojê serî li Wezareta Dadê da.
Wezareta Dadê piştî mehekê bersiva erênî da serlêdana DEM Partiyê û Pervîn Buldan û Sirri Sureyya Onder di 28ê Kanûnê de li Girava Îmraliyê bi Ocalan re hevdîtin pêk anîn.
Piştre Ahmet Turk jî tevli şandeyê bû. Li ser daxwaza Ocalan Onder, Buldan û Ahmet Turk bi partiyên siyasî re dest bi hevdîtinan kirin.
Şandeyê heta niha bi MHP, Partiya Pêşerojê, AKP û Partiya Saadetê re hevdîtin kiribû.
Piştî hevdîtina duyemîn şande di çarçoveya hevdîtinên ji bo pêvajoyê de serdana Herêma Kurdistana Iraqê kir û li wir bi serkirdeyên YNKê Bafil Talabanî, Kubat Talabanî û yên PDKê Mesûd Barzanî, Nêçîrvan Barzanî û Mesrûr Barzanî re civiyan.
Hevdîtina sêyem a bi Ocalan re di 27ê Sibatê de pêk hat. Piştî hevdîtinê peyama Ocalan li Stenbolê hat xwendin û Ocalan di peyamê de banga çek danînê kir.
Di şandeya vê carê de Ahmet Turk, Pervîn Buldan, Sirri Sureyya Onder, Tulay Hatîmogûllari, Tuncer Bakirhan, Cengîz Çîçek û Faîk Ozgur Erol cih girtin.
(AY)
