Wezîrê Parastinê yê Îsraîlê Israel Katz gef li Serokomarê Sûriyeyê Ahmed eş-Şara xwar. Katz diyar kir ku êrişên Îsraîlê yên li ser balafirgehên leşkerî û jêrxaneyên Sûriyeyê yên duh hatin kirin, "ji bo paşerojê hişyariyek" bûn.
Şeva borî balafirên şer ên Îsraîlê Navenda Lêkolînên Zanistî ya li Şamê, balafirgehên Hema û T4 jî di nav de çend herêman li Sûriyeyê bombebaran kirin. Li gorî îdiayan Tirkiye dixwaze li Balafirgeha T4ê baregehek ava bike.
Her weha Hêzên Esmanî yên Îsraîlê (IAF) êvarî duh ragihand ku wan li baregehên T4 û Hama "şiyanên leşkerî yên mayî" û her wiha "jêrxaneya leşkerî" ya nêzîkî Şama paytexta Sûriyeyê bomberan kirine.
Katz: Ez El Culanî hişyar dikim
*Yisrael Katz li çiyayê Şêx (Hermon) ku nuqteya herî bilind a Sûriyeyê ye ku ji 8'ê Kanûna 2024'an ve di bin dagirkeriya Îsraîlê de ye
Wezîrê Parastinê yê Îsraîlê Israel Katz li ser êrişên li Sûriyeyê daxuyaniyek da.
Wezîrê Parastinê Îsraîl Katz diyar kir ku êrişên Îsraîlê yên li ser balafirgehên leşkerî û jêrxaneyên Sûriyeyê yên duh hatin kirin, "ji bo paşerojê hişyariyek" bûn.
Katz got, "Îsraîl dê destûrê nede ku Sûriye bibe xeterek li hemberî gelê xwe û berjewendiyên xwe yên ewlehiyê."
Wezîrê Parastinê bangî Serokomarê demkî yê Sûriyeyê Ahmed eş Şara kir û got:
"Eger tu destûrê bidî hêzên dijminên Îsraîlê ku bikevin nava Sûriyeyê û metirsiyê bixin ser berjewendiyên ewlehiya Îsraîlê, tu dê bihayekî giran bidî. Operasyonên Hêzên Esmanî yên duh li dijî balafirgehên T4 û Hamayê û li herêma Şamê peyamek zelal û hişyariyek ji bo paşerojê ye. Em dê destûrê nedin ku ewlehiya Dewleta Îsraîlê zerer bibîne."
Gideon Saar: Îsraîl ji "rola neyînî" bi fikar e
Wezîrê Karên Derve yê Îsraîlê Gideon Saar ji bo hevdîtina bi Wezîrê Karên Derve yê Fransayê Jean-Noel Barrot re çû Parîsê.
Wezîrê Karên Derve yê Îsraîlê Gideon Saar di civîna çapemeniyê de birêvebiriya nû ya Sûriyeyê bi wê yekê tohmetbar kir ku "Ew dixwazin Sûriyeyê bixin bin parastina Tirkiyeyê."
Her weha wezîr Gideon Saar got, Îsraîl ji "rola neyînî" ya ku Tirkiye li Sûriye, Libnan û herêmên din dilîze bi fikar e.
Saar her wiha amaje bi birêvebiriya nû ya Sûriyeyê kir got, "Ji bo ku Sûriye bikeve bin parastina Tirkiyeyê, çi ji destê wan tê dikin."
(VC/AY)
*Çavkanî: Rudaw, AA
