Ji bo nûçeya tirkî bitikîne
Endamên Heyeta Aştiyê ya Navnetewî, îro bi Hevseroka Giştî ya Partiya Demokratîk a Gelan (HDP) Pervîn Bûldanê re li navenda giştî ya HDPyê civiya ne.
Wezîrê berê yê Karên Hundir û yê Edaletê yê Îzlandayê Ögmundur Jónasson, Sekreterê Giştî yê TSSA Sendîkaya Barkêşî ya Brîtanyayê Manuel Cortes, aktivîstê mafên mirovan, ekonomîst û akademisyenê arjantînî Beverly Ann Keene, hiqûqnasê sendîkayan ê ji ingiltereyê Paul Scholey, nivîskar, dîroktara filman û aktrîst Maxine Peak, ji Zanîngeha Edînbûrgê Connor Hayes û Alîkarê Sekreterê Giştî yê Sendîkaya UNITEyê ya Brîtanyayê Tony Burke di nava heyetê de bûne.
Heyet bi armanca ku lêkolînê li ser tecrît û grevên birçîbûnê bikin hatine tirkiyeyê. Endamên Heyetê piştî kombûna bi Bûldanê re civîneke çapemeniyê li dar xist. Endamên heyetê di civînê de diyar kirin ku divê tecrît rabe û divê edalet pêk were.
Leyla Guven Parlamentera HDPyê ya Colemêrgê bi armanca ku tecrîta li ser Serokê PKKyê Abdûllah Ocalanî rabe, 97 roj e di greva birçîbûnê de ye. Her weha Sebahat Tûncel Hevseroka Giştî ya DBPyê û Parlamentera berê ya Colemêrgê Selma Irmak jî ji 15ê Kanûna Paşiyê ya 2019ê û vir ve di greva birçîbûnê ya bêdem û bêdorveger de ne. Dîsa li girtîgehan 54 jê jin 247 jê mêr, bi giştî 301 girtî jî bi heman armancê di greva birçîbûnê de ne.
Bûldan: Ji bo rakirina tecrîtê em têdikoşin
Di civînê de pêşiyê Bûldan axivî ye û wiha gotiye:
“Em girîngiyê didin wî tiştî ku tecrîta gelekî giran a li ser Ocalanî di rojeva welatên Ewropayê de ye. Ji bo rakirina tecrîtê em têdikoşin lewre em tecrîtê weke pirsgirêka mirovahiyê û mafên mirovan dibînin.”
Daxwaza hevdîtinê li Wezîrê Dadê kirine
Piştî Bûldanê li ser navê heyetê Jónasson, Wezîrê berê yê Karên Navxweyî û yê Dadê yê Îzlandeyê axivî û got: “Me nameyek ji Wezîrê Dadê yê Tirkiyeyê re şand û me daxwaza hevdîtinê lê kir. Me di vê nameyê de jê re wiha got: Me got, em dizanin ku demeke dirêj e hevdîtina malbat û parêzerên Abdûllah Ocalanî nayê kirin. Me nameyek ji we re şand û em ji we rica dikin ku hûn şert û mercên serdana li Îmraliyê çêbikin ku li wir girtî ye. Em hîna li bendî bersiva nameyê ne.” (AS/FD)
