Hevdîtina Şandeya Îmraliyê û Ozgur Ozel dest pê kir
Hevdîtinên Şandeya Îmralyê yên bi partiyên siyasî yên ku nûnertiya wan li Meclisê hene re didomin.
Şandeya Îmraliyê di 28ê Kanûna Pêşiyê de bi Serokê PKKê Abdullah Ocalan re civiya. Piştî vê hevdîtinê li ser daxwaza Ocalan Partiya Wekhevî û Demokrasiyê ya Gelan (DEM Partî) biryar da ku bi partiyên siyasî re têkildarî mijarê hevdîtinan bike. Şandeya Îmraliyê îro bi Serokê Giştî yê CHPê Ozgur Ozel re civîya.
Li gorî nûçeya Ajansa Mezopotamyayê hevdîtin li odeya Ozel a li Meclisê hate kirin.
Sekretera Giştî ya CHPê Selîn Sayek Boke, Cîgira Serokê Giştî yê CHPê Gokçe Gokçen û Cîgirê Serokê Koma Meclisê yê CHP’ê Gokhan Gunaydin jî tev li hevdîtinê bûn.
Çi bûbû?
Rêberê PKKê Abdullah Ocalan di 23ê Cotmeha 2024an de di çarçoveya hevdîtina malbatê de piştî 43 mehan cara yekemîn bi biraziyê xwe Omer Ocalan, Parlamenterê DEM Partiyê yê Rihayê re hevdîtin kir. Ocalan di hevdîtinê de destnîşan kiribû ku tecrîda li ser wî didome û weha gotibû, "Ger şert û merc çêbibin, hêza min a teorîk û pratîkî heye ku vê pêvajoyê ji zemîna pevçûn û tundiyê derxînim ser qada hiqûqî û siyasî."
Piştî hevdîtinê Buroya Hiqûqê ya Sedsalê ragihand ku di 6ê Mijdara 2024an de 6 meh cezayê nû yê qedexekirina hevdîtinê li Ocalan hatiye birin.
Serokê Giştî yê MHPê Devlet Bahçelî di civîna koma partiya xwe ya 26ê Mijdarê de got, "Em li bendê ne ku di navbera Îmraliyê û koma DEMê de rû bi rû hevdîtin bên kirin."
Hevserokê Giştî yê DEM Partiyê Tuncer Bakirhan bersiva banga Bahçelî da û got, "Em weke hevserok dixwazin biçin hevdîtinê bi Birêz Ocalan re bike û tevkariyê li aştiya vî welatî bikin."
DEM Partiyê ji bo bi Ocalan re hevdîtinê bike heman rojê serî li Wezareta Dadê da.
Wezareta Dadê piştî mehekê bersiva erênî da serlêdana DEM Partiyê û Pervîn Buldan û Sirri Sureyya Onder di 28ê Kanûnê de li Girava Îmraliyê bi Ocalan re hevdîtin pêk anîn.
Piştre Ahmet Turk jî tevli şandeyê bû. Li ser daxwaza Ocalan Onder, Buldan û Ahmet Turk bi partiyên siyasî re dest bi hevdîtinan kirin.
Şandeyê heta niha bi MHP, Partiya Pêşerojê, AKP û Partiya Saadetê re hevdîtin kiriye.
(TY/AY)