Kovara Nûbiharê ji sê mehan carek derdikeve û bi hejmara xwe ya nû ya 171an li pêşberî xwendevanên xwe ye. Di vê hejmarê de gelek nivîs, lêkolîn, hevpeyvîn û helbest hene.
Kovar bi nivîsa edîtorê kovarê Suleyman Çevîk dest pê dike. Rohat Alakom di vê hejmarê de behsa wêneyên Joseph de Baye, yê ku li Qaxizmanê kişandine kiriye. Her weha Arkelogê Frensî Joseph de Baye di dawiya sedsala 19an, di serê sedsala 20an de gelek caran çûye Rûsya û Qefqasyayê. Dema diçe herêma Qefqasyayê, diçe Tiflîs, Rewan, Agirî û Qersê jî. Pirçandiya wan, kincên wan deran bala wî dikişîne. Fotografan dikişîne, dibe Fransayê. Hinekan diweşîne jî. Rohat Alakom wêneyên ku li Qaxizmanê kişandine, di vê jimarê de dane.
Li dinyayê gelek şairan gul kirine mijara helbestên xwe. Gelek şairan temamî li ser gulê helbesta xwe ava kirine. Ji wan şi’ran re Gulname dibêjin. Yek ji wan şairên me jî Şêx Ebdurrehmanê Aqtepî ye ku Gulnama wî gelek meşhûr e. M. Zahir Ertekin di vê hejmarê de Analîzek li dor Gulnameya Şêx Ebdurrehmanê Aqtepî nivîsiye.
Ayhan Geverî di nivîsa xwe de, di çarçova nêrîna Melayê Cizîrî de ‘Aşiq, Maşûq û Reqîb îzah kiriye. Wekî din Geverî, li ser Mela Feyselê Taş jî nivîsiye. Mela Feysel ji gundê Dadînan yê Vartoyê bû û îsal wefat kir.
Mele Mihemedê Kêrsî di nivîsa xwe de, behsa Dubaskîtiya medresên Kurdan kiriye. Yanê pevrebûna ilmê medresê û terîqetê kiriye mijara nivîsa xwe.
Gulpik gundekî Hîzanê ye. Herî kêm 100 sal berê kesekî bi navê Mela Emer li vir jiyaye. Bi henek û laqirdiyên xwe nav daye. Bedirxan Epözdemir jî di vê jimarê de li ser vê taybetiya Mela Emer sekiniye û ji wan pêkenînên wî nimûne dane.
Salih Kevirbirî di nivîsa xwe de dixwaze bala me bikşîne ser Kurdên Qefqasyayê ku di dema xwe de xizmetên bêhemta kirine.
Abdullah Încekan di vê jimarê de ji Dîwana Goethe beşa Hîkmetnameyê ji Almanî wergerandiye Kurmancî.
Evîn Şikakiyê jî li ser helbestkara hêja Diya Ciwan nivîsiye. Diya Ciwan di 26ê Sibata 2025an de wefat kir. Li pey xwe şop û zimanek paqij û gelek berhem hîştin.
Hepveyvîna vê hejmarê jî Nihad Gultekin bi dengbêja jin Dîlbera Wekîl re kiriye.
Nivîs û Çîrok
Her weha Ahmedê Hepo, Sabri Akbel, Ebru Yılmaz, Mela Omerê Tetwanî, Ozan Serhedî, Yılmaz Elagöz, Amîne Pîrozxan, Mehdî Ritamî, Ayşegul Kızılkaya, Walter Benjamin, Dilazad A.R.T., Ferhat Çiftçi, Sadullahê Misircî û Abdulkadir Gök bi nivîs û çîrokên xwe di vê hejmarê de ne.
Helbest
Abdullah Încekan, Evîn Şikakiyê, Ahmedê Hepo, Sabri Akbel, Ebru Yılmaz, Mela Omerê Tetwanî, Ozan Serhedî, Yılmaz Elagöz, Amîne Pîrozxan, Mehdî Ritamî, Ayşegul Kizilkaya, Walter Benjamin, Dilazad A.R.T., Ferhat Çiftçi, Sadullahê Misircî û Abdulkadir Gok bi nivîsên xwe; Rojen Barnas, Berken Bereh, Mewlana Celaleddînê Romî, Melih Cevdet Anday, Sidîq Gorîcan, Mihemed Elî Bayram, Xewneroj, Zeynep Şemdinoglu, Qedrî Sipranî, Mustafa Ertaş, Xortê Nazik, Burhan Tuz, Ayşegul Kizilkaya, Salihê Kevirbirî, Umêd Qerenî, Asyah Goyî, Reyhan Sarhan û Mustafa Işik bi helbestên xwe di vê hejmarê de cih girtine.
(AY)
