Kovara Dilopê di hejmara xwe ya 13an de dosyayek li ser Cegerxwîn û helbesta wî amade kiriye. Kovar di Newrozê de sala xwe ya 2. temam dike û wê bikeve sala xwe ya 3an.
"Cigerxwîn: Kî me ez?"
Dosye ji nîqaşên Lal Laleş, Şener Ozmen û Vecdî Erbayî û ji nivîsa Îsmaîl Dîndarî pêk hatiye. Bi van nîqaşan û vê nivîsê kesayetiya Cegerxwîn, sekna wî ya rewşenbîrî û poetîkaya helbesta wî li ber çavan hatiye raxistin. Navê dosyeyê ji helbesta Cigerxwîn a bi heman navî hatiye diyarkirin.
Piştî hewqas salan hê jî pirseke muhîm e bo kurdan pirsa Cigerxwîn. Dilop jî bi rêya Cigerxwîn dîsa bibîr tîne; kî me ez, kî ne em?
Di vê hejmara kovarê de Recep Maraşlı û Mesut Alp qala tarîxa newrozê dikin. Roportaja ligel Eskerê Boyik tespîtên girîng dihundirîne. Eskerê Boyik ê yek ji kurdên sovyetistanê dibêje “Bi hilweşîna sovyetê re biratiya gelan jî hilweşiya”.
Dîsa roportaja ligel Murat Uçanerê lêkolîner û nivîskar jî rewşa ermenên entabê, qetilkirina wan û desteserkirina mal û milkên wan bi berfirehî vedibêje. Di salvegera 24ê Nîsanê de tespîtên muhîm hene di vê hevpeyvînê de jî.
Mehmet Bayrak ketiye pey şopa heqîqeta kurdan di warê arkeoloji, folklor û etnografyayê de.
Sezai Sarıoğlu û Sertaç Kayar jî dîroka Xarpêt û Heskîfê vediçirînin. Ligel van Evîn Şikakî, Amed Tîgrîs, Ayhan Erkmen, Bulent Gedîk, Omer Uluçay û Miradê Miradan bi nivîsên xwe yên kurdî; Barış Avşar, Mehmet Özyazanlar û Ali Sinemilli bi nivîsên xwe yên tirkî di hejmara 13an dewlemendtir dikin.
Şairên hejmara nû Cemal Sureya, Qedrî Sipranî, Veysî Ulgen û Mehsûn Reşçelan in. (FD)
