Endamê Buroya Siyasî ya Tevgera Hemasê Usame El Hemdan di civîna çapemeniyê ya ku li Ofîsa Hamasê ya Beyrûtê hat lidarxistin de têkildarî peymana pevguhertina dîlgirtiyan û agirbestê ya ku Hamasê bi rêya welatên navbeynkar pêşkêşî hikûmeta Îsraîlê kiribû, daxuyanî da.
Li gorî nûçeya AAyê Hemdan destnîşan kir ku Hemas ji bo agirbesteke berfireh û bêkêmahî dixebite, Hemdan wiha got: "Hamasê di peymanê de pêşniyarên weke şandina alîkariyan û malzemeyên alîkariyê, bidawîkirina êrîşên hovane yên li ser sivîlan, zarok, jin û kal û pîrên bê parastin û dabînkirina stargehek ewle ji bo awareyan, ji bo ji nû ve avakirina Xezeyê û rakirina dorpêçe li ser wê û pevguhertina dîlgirtiyan pêşkêş kirin."
Helwesta Îsraîlê
Hemdan diyar kir ku tevî helwesta Îsraîlê ya ku mafên herî bingehîn ên gelê Filistînê înkar dike, Hamasê bersiveke erênî da peymana lihevkirinê û got, Îsraîl ji roja ku mutabakata peymanê hatiye ragihandin û heta niha bi israr daxuyanî dide ku ew ê êrîşên xwe yên li ser Xezeyê bidomînin.
Hemdan daxuyaniya dawî ya Serokwezîrê Îsraîlê Benjamin Netanyahu ya derbarê peymana lihevkirinê de bi bîr xist û diyar kir ku Netanyahu gotiye ku ew ê artêşa xwe ji Xezeyê venekişine û Filistîniyên di zindanan de ne bernedin.
Welat û saziyên garantor
Li ser pirsa rojnamevanan ku ji bilî Misir û Qeterê di peymana lihevkirinê de kîjan welatên garantor hene, Hemdan got, "Di pêşniyara me ya ji bo agirbesta li Xezeyê de, me daxwaz kir ku Misir, Qeter, Tirkiye, Rûsya û Neteweyên Yekbûyî di her cûre peymanê de bibin garantor.
(AS/AY)
