Evîna li sêvan hatî çandin: Sêva Mêxekrêj

Sêvên qernefil lê hatî çandin dikare sed salan xera nebe(Wêne: Murat Bayram/bianet) 

Koma çalakiyan a ciwanên kurd ên li Stenbolê, Chalak Events di bin çavdêrîya hûnermendê naskirî Seywan Saedianî de di roja evîndaran de(14ê Sibatê) atolyeya “Sêvên Mêxrêj” pêk anî.

Bibîne - Galerîya wêneyan 

Hûnermendê naskirî Seywan Saedianî çavdêrî li atolyeyê kir(Wêne: Murat Bayram/bianet) 

Li gor çanda qedîm a kurdan evîndar ji bo evîndara/ê xwe qernefilan li sêvan diçînin û didin hevdu. Heta sed salan ew sêv xera nabe, bêhna xweş dide û sembola evîna demdirêj e.

Chalakê danasîna bernameya xwe bi van gotinan kiriye:

“14ê Sibatê li cihanê wekî “Valentine's Day" tê pîroz kirin. Em jî vê rojê wek Valantayna Kurdî bi atolyeya “Sêva Mêxekrêj” li Salona Cezayirê li dar dixin. Serkarê atolyê wênesaz, peykervan, nivîskar Seywan Saediyan e. Sêv, mêxek (qerenfîl), zendik aîdî me ye, beşdarbûn aîdî te. Were û ji vê atolyê û kevneşopiye nemîne!

“Sêva Mêxekrêj, sêveke xwezayî ye. Piştî ku bi mêxan (qerenfîlan) tê xemilandin ji sed salan zêdetir wekî xwe dimîne. Sêva mêxekrêj kevneşopiyeke kevn a Kurdan e. Hêmayeke evînî û aşitîperwer dihewîne. Sêva mêxekrêj ji bo du armancan hatiye bikaranîn:

Beşdaran qernefil li sêvan çandin(Wêne: Ferid Demirel/bianet) 

“1) Dema ku yek evîndarê yekî/ê bibe û nikaribe vê bîne ziman sêvekê bi mêxekan (qerenfîlan) dixemilîne wekî nîşaneya evîna xwe ji hezkiriya/ê xwe re bi rê dike.

“2) Dema ku du kes an jî du evîndar ji hev dixeyidin yek ji wan ji bo aşitiyê sevekê bi mêxan dixemilîne û ji yê/a din re bi rê dike.”

Chalakê bi têbînîyekê diyar kir ku hûnermendê Saedian ji bo ev çanda kurdan neyê jibîrkirin 14 salan xebitiye.(MB)