10 karkerên daristanê dema ku li herêma Seyitgaziyê (Seyitozu) ya Eskîşehirê midaxele li şewatê dikirin, di nav agir de asê man û jiyana xwe ji dest dan.
Şewata ku li herêma Buyukyayla-Fethiye ya nêzîkî navçeya Seyitgaziyê derket, ji ber bayê bi lez belav bû û gihîşt sînorê navçeya Îhsaniye ya Afyonkarahîsarê. Karkerên daristanê yên ku ji bo vemirandina agir hatibûn erkdarkirin di nav agir de asê man.
Li gorî daxuyaniyên fermî, 10 karkerên daristanê şewitîn û mirin. 12 karker karîn ji agir birevin û xwe bigihînin şikeftan. Her weha ji aliyên ekîban ve hatin rizgarkirin. Karkerek ku di destê xwe de birîndar bûbû, hate dermankirin.
Wezîr: Pênc ji miriyan wezîfedarên AKUTê bûn
Wezîrê Çandinî û Daristanan Îbrahîm Yumaklı ragihand ku pênc ji miriyan ewezîfedarên AKUTê bûn û dermankirina 14 kesan didome.
Şaredara Bajarê Mezin a Eskîşehirê Ayşe Unluceyê li ser medyaya civakî zanyariya mirinên ji ber şewatê parve kir. Lêpirsînek fermî li ser bûyerê hatiye destpêkirin. Rayedaran bang li xurtkirina binesaziya agirkujiyê kirin da ku pêşî li bûyerên bi vî rengî bigirin.
Çok üzgünüz, şehitlerimiz var! 🇹🇷
— Ayşe Ünlüce (@ayseunluce) July 23, 2025
Seyitgazi ilçemiz Büyükyayla-Fethiye mahallelerimizde başlayan ve Afyon’a da sıçrayan orman yangınında sahada çalışan 10 kahraman emekçi ne yazık ki şehit oldu.
Bölgeye ulaşmak üzere Seyitgazi yolundayım.
Ülkemize baş sağlığı, şehitlerimizin… pic.twitter.com/QQVCSPv4Zj
Li herêmê pênc helîkopter, gelek kamyonên avê û ekîbên agirkujiyê midaxeleyî şewatê kirin. Ba û zehmetiyên ji ber erazî hewldanên rizgarkirinê zihmetir kir. Ji ber qutbûna telefon û bêtêlan dereng bi hin karkeran re pêwendî hat danîn.
Rola mirovan di şewatên daristanan de
Lêkolînên li ser şewatên daristanan li Tirkiyeyê nîşan didin ku çalakiyên mirovan di beşek mezin a van şewatan de roleke girîng dilîzin. Gelek ji şewatan, ku di salên dawî de zêde bûne, ji ber xeletiya mirovan an jî kiryarên bi zanebûn çêdibin.
Li gorî lêkolînan, ji sedî 90 zêdetir şewat ji ber mirovan çêdibin. Ev rêje ji ber faktorên wekî dûvikên cixareyê yên bi bêhemdî hatine avêtin, şewitandina kok û bermahiyên gîhayan û çirûskên ji xetên elektrîkê çêdibe derdikeve holê. Her weha wêrankirina daristanan a bi zanebûn û şewatên ji bo avakirinê vê rewşê girantir dikin.
Li gorî rapora sala 2023an a Komeleya Daristanvanên Tirkiyeyê (TOD), sedemên sereke yên şewatên ji ber mirovan çêdibin û ev jî çalakiyên wekî şewatên li seyrangehan, paqijkirina zeviyan û avakirina bêdestûr in. Di raporê de, TOD destnîşan dike ku piraniya şewatan ji ber xeletiyên mirovan çêdibin û belavbûna şewatan a bi awayekî lez jî ji ber krîza avhewayê zêde dibe.
(AEK/AY)
