Weşanxaneya Avestayê û Weqfa Îsmaîl Beşîkçîyî(IBV) dê 6ê Nîsanê bernameyeka bi navê “Dengvedana Arthur Rimbaud li banê kurmancîyê” pêk bîne. Di bernameyê de Ergîn Sertem dê li ser helbestên Arthur Rimbaudî biaxive û paşê kitêba helbestên wî yên wergerandî îmze bike.
Bername dê li avahiya IBVyê, siet 18ê bê pêkanîn. Ergîn Sertemî “Illuminations”a Arthur Rimbaudî wergerandibû kurmancîyê.
Bixwîne - “Illuminations”a Arthur Rimbaudî êdî bi kurdî ye
"Illumination" bûbû kurmancî
Ergîn Sertemî kitêba Arthur Rimbaudî ya bi navê "Illumination" bi navê "Birqên direxşan” wergerandibû zimanê kurdî û weşanxaneya Avestayê ew weşandibû.
Arthur Rimbaud, yek ji pêşîkêşên sembolîzmê ye.
41 helbestên pexşan û duyên menzûm
Illuminations an Birqên Direxşan, ku ji 41 helbestên pexşan û duyên menzûm pêk tê, bê şik lûtkeya helbest û hunerkariya Rimbaud ye û yek ji girîngtirîn metnên dîroka helbesta cîhanê ye.
Her yek ji van “birq”an, bi gotina Rimbaud, “xewneke tîr û çapik e” û bi hev re wek kaleidoskopeke bênizam a “fenerên sihrî” ne.
Pêşgotina Kawa Nemirî
Kawa Nemir li ser wergera Rimbaud wiha nivîsiye:
“Dewrê eyyam ê helbestê bi derewên “bêhejmar nifşên debengên ristebend” derbas bû, ku ‛eyan e mebest ji vê yekê ne welê bi hêsanî reşkirina wê kelepora civiyayî (qewî çiviyayî heçku) ya mirovayiyê ye, lê, û, paşê Rimbaud hulustî ji wê zêya hurr û xef a helbestê de, ya zehf kêm beşerên beşerxweş ên kelamê rêya xwe bi ser xistî. Illuminations’a bi kilîla zimanî û poetîk a şikûdar a Ergîn Sertemî berceste bûyî bi kurdî bi navê “Birqên Direxşan”, va ye, delîlê dadaneveya deriyê wî dewrî ye û vekirina deriyê nû ye, hem bo kurdî û hem bo Rimbaud’yê ewledê gerdûnê.
Û, her wiha, ev werger bi xwe, di vê serdema zimanê me de, derseke mezin e bo hemû ehlên dilpak ên zimanê kurdî yên ku xwînê ji xwe berdidin da ku metnên gerdûnî wergerînine kurdî. Ne cihê gumanê ye ku wergera Illuminations’a Arthur Rimbaud bi navê “Birqên Direxşan” wergereke welê ye ku heq dike her bimîne wekî taca seriyan.”
(MB)
Çavkanî: Avesta
