Li herêma Erasatê ya Bexdaya Iraqê di pevçûnekê de rojnameger Leys Mihemed Riza ku di Ajansa Nûçeyan a Îraqê (INA) de dixebite hat kuştin.

Li gorî nûçeya Rûdawê, Ajansa Nûçeyan a Îraqê(INA) di daxuyaniyekê de ragihandiye ku karmendê wan Leys Mihemed Riza di encama nîqaşekê de hatiye kuştin.

Ajansê ji rayedarên ewlehiyê xwest ku bilez bûyerê lêkolînê bikin û berpirsyaran radestî dadgehê bikin.

Ji bo girtina kujer lêpirsîn dane destpêkirin

Birêvebiriya Polîsan a Resafê ya Bexdayê da zanîn ku bûyer ne êrişeke terorîstî ye û Leys Mihemed Riza di encama nîqaşeke li gel kesekî de bi guleyan hatiye kuştin.

Polîs diyar kir ku lêpirsîna li ser bûyerê û ji bo girtina gumanbar berdewam dike lê heta niha kes nehatiye desteserkirin.

Her weha li gorî nûçeya INAyê Fermandarê Operasyonên Bexdayê Welîd Xelîfe El Temîmî piştrast kir ku ji bo girtina kujerê rojnameger Lays Mihemed Riza wan xebat dane destpêkirin.

Temîmî ji Ajansa Nûçeyan a Iraqê (INA) re weha gotiye: "Tîmeke ewlehiyê ji bo ku kujerê rojnamevan Lays Mihemed Riza zeft bike dest bi şopandinê kir."

INA: Divê berpirsiyar werin darizandin

Ajansa Nûçeyan a Îraqê kuştina karmendê xwe bi tundî şermezar kir û ji rayedaran xwest ku di demeke kurt de bûyer were ronîkirin û sûcdar werin darizandin.

Di daxuyaniyê de hat gotin:

“Şehîd Leys Mihemed, karmendekî dilsoz, fedakar û kesekî ji aliyê hemû kesan ve dihat hezkirin bû.”

(AY)