Rêvebiriya Giştî ya Emniyetê têkildarî îdiayên di binçavan de êrîşa zayendî hatiye kirin yên ku li ser medyaya civakî bûye rojev, daxuyanî da. Di daxuyaniyê de hat destnîşankirin ku îdiayên navborî bêbingeh û îftira ne.
Rayedarên Emniyetê diyar kirin ku bi van îdiayan saziyên wan hedef tên girtin û got, "Giliyê kesên ku van îftîrayan belav dikin,hat kirin."
“Gilî hat kirin”
Di daxuyaniya Rêvebiriya Emniyetê ya li ser medyaya civakî weşiyaye de wiha hat gotin:
"Di hin hesabên medyaya civakî de parvekirinên weke 'Em ê her roj li ser jinên ku di binçavan de rastî êrîşa zayendî tên biaxivin û li dijî vê li ber xwe bidin.' hene. Ev parvekirinên ji rastiyê dûr û bêbingeh, îftirayên hovane ne ku ji bo bêîtibarkirina saziya me ye. Teşkîlata Polîsên Tirk di çarçoveya qanûnan de hemû pêkanînên derbarê kesên hatine binçavkirin de bi baldarî û hesasiyeteke mezin dimeşîne. Derbarê kesên ku bi rêya hesabên medyaya civakî van buxtanan belav dikin jî gilî hat kirin."
(EMK/AY)
