Dunyaş mtel nenapeşi nananenaş ndğa buxvamamt!

Dil Hakları İzleme Belgeleme ve Raporla Ağı (DHİBRA) bileşeni 99 örgüt, kurum, platform 21 Şubat Dünya Anadili Günü dolayısıyla Türkiye'de var olan 19 anadil ile ilgili taleplerini duyurdu.

TIKLAYIN- 18 anadilde 21 Şubat açıklaması 

19 anadilde yapılan açıklamanın Lazcası için şöyle:

UNESCO-k 17 Ʒ̆ilva 1999-s na gamaʒxadu, 21 K̆undura Int̆ernasionaluri Nananenaş Dğaşi gurişeni nananenas mu tkvala ren do mus ipelen k̆ai na oxuʒ̆onunapun, ham dulyas gurigedvaleri siviluri xalk̆iş objekt̆epe 2021 ʒ̆anas xolo na minonanpeşi otkvaluşeni kok̆obik̆atit.

Turkieş xampoba na ren mtel nananenapeşi do nenuri p̆luralizmis, k̆ata irişi mop̆icus do mxuci meçamus, haşoten çkvanobape çkunite ok̆ozaderi do arte oskidus up̆irebun. Nenuri xak̆epes na goʒ̆uz̆in endolepe va moiselesna demok̆rasi var iven. Hayas anank̆eni na uğun devleti, xark̆i do tito-tito mitxanepes dido dulyape eondunan.

Ipti, na eç̆k̆vadalaş gzas na gedgitu nenape, uk̆ule çkva do çkva Turkieş nenapeşi oskedinuşeni guri gedvaleri do meç̆ireli na içalişaman şuri do organizasyonepek memleketi çkunişi k̆ult̆uruli xampobaşeni na inç̆işenan k̆abuli oxenoni do hantepes mxuci meçamoni na boret bicert.

Nenuri Xak̆epeş Oʒ̆k̆omilu, Oç̆aru do Rap̆ori gamağmaluş Mosaşi (DHİBRA) mak̆aturepe na boret çku, jin na molobişinitpeten mtelis hayaşeni bucoxamt.

1) Nananenaşi doguru do ofisialurot oxmaruşeni serbesoba na meçams xuk̆uk̆is do oktalus geiʒ̆opxinas do na ren geʒ̆opxerepeti uendole do k̆arari na niçinust̆eri ixeninas.

2) Eç̆k̆vadalaş gzas na gedginan nenapeşi oçvaluşeni mtini gza ik̆açinas, ham temas na içalişaman siviluri xalk̆iş objekt̆epe manişa mxuci niçinas.

3) Dobadonas na ixmarinen nananenapets na nunʒxun universitepes na geidgu artobape (nortepe, depart̆manepe do enst̆itupe) moinz̆inas do na renanpeti xolo oxmaroniten do  k̆apasiteten moişkvinas.

4) Artoburi Opapeş Generaluri K̆urulik 2 Çxalva 1990-s gzas na gyodginu do Turkiek 2 Çxalva 1995-s k̆abuli na vu Berepeş Xak̆epeşi Ok̆ondvalas nananenaşeni na ç̆arun sumi maddepes Turkiek na gedu goʒ̆azdalupe moiselinas.

Nenaş xak̆epe k̆oçinobaş xak̆epeşi ugamak̆atu ar norte ren!

Dunyaş mtel nenapeşi nananenaş ndğa buxvamamt!

Çeviri : Nenuri Xak̆epeş Oʒ̆k̆omilu, Oç̆aru do Rap̆ori Gamağmaluş Mosa (DHİBRA)

(RT)