Danişîna doza Bahar Aksuyê ku li Şîşliya Stenbolê ji aliyê hevjînê xwe yê berê Rustem Elibol ve hatibû kuştin, li 4emîn Dadgeha Cezayê Giran a li Edliyeya Stenbolê ya li Çaglayanê pêk hat.
Di dozê de 4 bersûcên mêr tên darizandin û dadgehê danişîn taloqî 25ê Hezîranê kir. Her weha biryar hat dayîn ku dê bersûc girtî bimîne.
Bersûc Rustem Elibol û sê kesên ku tê îdiakirin alîkariya wî kirine, bi rêya SEGBÎSê beşdarî danişînê bûn.
PLATFORMA JİNAN A DÎCLE AMEDÊ
"Em ji bo Bahar Aksû û hemû jinen ku hatine qetilkirin li qadan in"
Ji bo bersûcan cezayê muebbetê yê girankirî û heta 14 sal cezayê girtîgehê tê xwestin.
Yek ji bersûcan Rustem Elibol, îdia kir ku bûyer ne plankirî bû û got, "Ez pir poşman im. Min dixwest em li hev bên, lê bûyer ji nişkê ve qewimî." Sê bersûcên din îdia kirin ku ew hay jê nebûne ku bûyer dê bibe sedema kuştinê.
"Divê êrîşkar bên cezakirin"
Li gorî nûçeya rojnameya Evrenselê, jin û rêxistinên civaka sivîl beriya danişînê li ber edliyeyê kom bûn û daxuyaniyek çapemeniyê dan û daxwaza edaletê kirin.
Xwişka Bahar Aksuyê, Beril Aksuyê jî got, "Ez ê tu carî xwişka xwe ji bîr nekim, ez ê heta dawiyê mafê wê biparêzim."
Jinan di daxuyaniya xwe de destnîşan kirin ku delîlên li cihê bûyerê nehatine parastin û jin bi têra xwe nehatine parastin û gotin, "Heta ku faîl neyên cezakirin, ev kuştin dê ranewestin."
Çi bûbû?
Bahar Aksu di sala 2022an de ji hevjînê xwe yê berê Rustem Elîbol cihê bûbû. Rustem Elîbol di sala 2025an de xwest bi darê zorê li Şîşliyê Aksuyê li wesayîta xwe siwar bike û di wê kêliyê de Aksû bi çeka Elîbol hat kuştin. Kesên bi navê Samet S., Semih Y. û Aziz B. jî li gel Elibol bûn, piştî bûyerê hatin girtin.
Di çarçoveya lêpirsîna berdewam de, hat destnîşankirin ku Elîbol berî kuştina Aksuyê çek peyda kiriye û çend rojan beriya bûyerê li Stenbolê mabû. Di îdianameyê de ji bo bersûcan cezayê muebbetê yê girankirî hat xwestin.
(EMK/AY)
