Ji bo nûçeya tirkî bitikîne
Komisyona Zarokan a Komeleya Mafên Mirovan (İHD) ya Amedê “Rapora Binpêkirina Mafên Zarokan ên li Rojhilat û Rojhilatê Başûr ên Sala 2018ê” aşkere kiriye.
Li gorî raporê, sala 2018ê saleke wisa bûye ku gelek caran mafên zarokan hatine binpêkirin. Di raporê de hatiye diyarkirin ku di vê salê de 41 zarok mirine, 64 zarok jî birîndar bûne.
Komisyonê di raporê de destnîşan kiriye ku “Pêvajoya şer û pevçûnan û binpêkirina mafan ên ku nêzîkî 35 sal in li herêmê berdewam dike, dîsa herî zêde bandor li ser zarokan kiriye”. Hatiye gotin ku zarok rastî tundkariyê hatine, istismara zayendî li wan hatiye kirin, neçarî karkirinê hatine kirin û di dema kar de mirine, bi darê zorê hatine zewicandin, bi zimanê dayikê perwerdeyê nabînin û kêmasî di sîstema perwerdeyê de hene.
3 zarokan xwe kuştiye
Bûyerên ku hatine berhevkirin û di raporê de hatine weşandin wiha ne:
Di sala 2018ê de li Herêma Rojhilat û Rojhilatê Başûr de; hêzên asayişê yên fermî gule berdane û zarokek miriye, zarokek jî birîndar bûye. Di encama şerê çekdarî de zarokek birîndar bûye. Di encama êrîşên bombeyî de zarokek miriye. Di encama xetayên fermî û ihmalkariyê de sê zarok mirine, 46 zarok jî birîndar bûne. Di encama mayin û teqemeniyê bê xwedî de du zarok mirine, du zarok jî birîndar bûne. sê zarokan xwe kuştî ye, kuştina du zarokan jî bi guman bûye. Çar zarokan xwestiye ku xwe bikujin. Sala 2018ê ji hêla Serokwezaretê ve weke sala têkoşîna bi karkeriya zarokan hatibû ragihandin. Lê li gorî rapora Meclîsa Tenduristiya Karî û Ewlehiya Karkeran, li herêma Rojhilat û Rojhilatê Başur, 22 zarokên ku bi darê zorê kar bi wan dihatin kirin, di dema karî de mirine.
Di dema desteserkirinê û girtîgehan de îşkence tê kirin
Di encama çalakiyên girseyî yan jî serdegirtina malan de, herî kêm 54 zarok hatine desteserkirin. Îşkence li du zarokan hatiye kirin. Li derveyî cihên desteserkirinê îşkence li sê zarokan, li girtîgehan jî îşkence li du zarokan hatiye kirin. Heft zarok di encama tundkariya di nava malan an jî li nava civakê de mirine. 14 zarok birîndar bûne. Istismar li 92 zarokan hatiye kirin û çar zarok hatine revandin. (AO/FD)
