Rêxistina Navneteweyî ya Koçberiyê (IOM) ya Neteweyên Yekbûyî (NY) ragihand ku tenê di çar rojên dawî de li Xezeyê zêdetirî 97 hezar kes ji cih û warên xwe bûne.
IOM koçberbûna bi darê zorê a li Xezeyê li ser medyaya civakî parve kir. Xeze di bin dorpêç û êrişên Îsraîlê de ye.
Di parvekirinê de hat destnîşankirin ku li Xezeyê koçberî berdewam e û wiha hat gotin, "Di 4 rojên dawî de li Xezeyê zêdetirî 97,000 kes koçber bûne.”
IOMê destnîşan kiriye ku ew digel hevkarên xwe amade ne ku alîkariyê bide kesên ku li Xezeyê li cih û warên xwe bûne û weha gotiye, "Divê agirbest demildest pêk were. Ji bo xebatkirinê hewcedariya me bi gihîştineke ewledar û domdar heye."
Armanca Îsraîlê dagirkeriyeke mayînde ye
Piştî agirbesta li Xezeyê ku di 19ê Çileyê de ket meriyetê, artêşa Îsraîlê di sibeha 18ê Adarê de êrîşên xwe yên dijwar ji nû ve dest pê kirin.
Ji dema ku artêşa Îsraîlê êrîşên xwe ji nû ve da dest pê kirin heta niha 3 hezar û 340 Filistînî, ku piraniya wan kal û pîr, jin û zarok bûn, jiyana xwe ji dest dane û 9 hezar û 357 kes jî birîndar bûne.
Hejmara Filistîniyên ku ji 7ê Cotmeha 2023an vir ve di êrîşên Îsraîlê yên li ser Xezeyê de jiyana xwe ji dest dane gihîştiye 53 hezar û 475 kesan û hejmara birîndaran jî gihîştiye 121 hezar û 398 kesan.
Artêşa Îsraîlê dest bi pêkanîna planeke êrîşê kiriye ku dê dagirkirina Xeta Xezeyê berfireh û wê mayînde bike. Her weha Serokwezîr Benjamin Netanyahu ragihandiye ku ew ê tevahiya Xeta Xezeyê dagir bikin.
(AB/AY)
