DFG: di meha Kanûna Paşiyê de 9 rojnameger hatin girtin

Komeleya Rojnamegeran a Dîcle Firatê (DFG) rapora xwe ya têkildarî binpêkirinên mafên rojnamegeran a meha Kanûna Paşiyê aşkere kir.

DFGê di rapora xwe de destnîşan kiriye ku di 2024an de derbarê 74 rojnamegeran de lêpirsîn hatiye destpêkirin.

Li gorî nûçeya Ajansa Mezopotamyayê Rapora DFGyê weha ye: "Tenê di meha Kanûna Paşiyê de derbarê 42 rojnamegeran de lêpirsîn hatiye destpêkirin. Ji lêpirsînên hatine destpêkirin 17 veguherîn dozê. Ev dane nişan didin ku zext û sansura desthilat pêk tîne çiqas xeternak e."

"Ji ber ku li Halk TVyê hevdîtina bi kesê pispor re parve kirin der barê pênc rojnamegeran de lêpirsîn hate destpêkirin. Bi hinceta li ser hesabên xwe yên medyaya civakî Nazim Daştan û Cîhan Bîlgîn parve kirin der barê Seyhan Avşar, Ahmet Dogan Akin û Candan Yildiz de lêpirsîn hate destpêkirin û ev lêpirsîn veguherî dozê."

9 rojnameger hatin girtin 

"Zextên li dijî rojnamegeran bi tenê destpêkirina lêpirsînan bi sînor nema. Di meha Kanûnê de 18 rojnameger tene ji bo ku pîşeya xwe kirin hatin desteserkirin. Ji 18 rojnamegerên hatin desteserkirin 9 jê hatin girtin. Polîsan di 17ê Kanûnê de bi ser şîrketên produksiyonê yên Guncel û Martiyê de girtin û di çarçoveya heman lêpirsînê de li bajarên Wan, Mêrsîn û Stenbolê jî bi ser malan de girtin. Rojnameger Reyhan Hacioglû, Rahîme Kavrar, Velat Ekîn, Necla Demîr Arvas, Vedat Oruç, Ahmet Guneş û Eylem Babayîgît ên hatin binçavkirin, hatin girtin. Her wiha Gerînendeyê Weşanê yê Giştî yê Halk TVyê Sûat Toktaş û nûçegihana ETHAyê Zulehya Muldur hatin girtin."

"Rojnamegeran di meha Çileyê de zêdetirî mesaiya xwe li korîdorên edliyeyê derbas kirin. Di 43 dosyayan de 102 rojnameger ji ber xebatên xwe yên pîşeyî hatin darizandin. Di encama van darizandinan de ji 12 rojnamegeran re 31 sal û 2 meh cezayê hefsê hate birîn. Yek ji van rojnamegeran jî Midûra Nûçeyan a JINNEWS’ê ya berê Sofya Alagaş e. Hevşaredara Sêrtê Sofya Alagaş ji ber dozên têkildarî serdema rojnamegerî dikir de der barê wê de hatibûn vekirin û didomin tê darizandin. Danişîna doza Sofya Alagaş li 5emîn Dadgeha Cezayê Giran a Amedê hate lidarxistin. Sofya Alagaş di doza jê dihate darizandin de 6 sal û 3 meh cezayê hefsê lê hate birin."

Sansur

"Zexteke din a li dijî rojnamegeran jî bû sansur. Desthilata ku li ser bertekan sîxurtiya bandorkirinê û Qanûna Sîxurtiyê bi paş ve kişand, di 10ê Kanûna Paşiyê Roja Rojnamegerên Dixebitin de qanûneke din a sansurê anî Meclisê. Parlamenterên AKPê Atay Ûslû û Alî Ozkaya û 133 parlamenter di 10ê Kanûna de Teklîfa Qanûna Ewlehiyê ya Sîber a nû pêşkeşî Meclisê kir. Teklîf di 15ê Kanûnê de li Komîsyona Parastinê ya Meclisê hate qebûlkirin. Partiya Îyî jî piştgirî da teklîfê. Teklîfa Qanûna Ewlehiyê ya Sîber ku ji kesên nûçeya ‘parvekirina daneyan’ çêdike re ji 2 salan heta 5 salan cezayê hefsê raber dike, di Komîsyona Parastinê ya Meclisê re derbas bû. Hiqûqnasan hişyar kirin ku heke ev teklîf bi vî awayî bibe qanûn dê ji bo mafên bingehîn ên mirovan û pergala civaka demokratik bibe gefeke cidî."

"Li aliyê din menejer Ayşe Barim a di çarçoveya lêpirsîna Parka Geziyê de hate binçavkirin, piştî kar û barên îfadeyê yên li edliyeyê bi hinceta ‘Sîxûrtiya Bandorkirinê’ kiriye hate girtin. Cihê fikaran e ku qanûneke hêj li Meclisê nehatiye qebûlkirin bi awayekî fîîlî were pêkanîn. Ev sûcdarkirina dijhiqûqî li pêş azadiya çapemenî, raman û îfadeyê weke xetereyeke mezin disekine."

Astengkirin

"Di meha Kanûnê de bi hinceta parastina ewlehiya netewî û pergala giştî hesabê Ajansa Mezopotamyayê (@MAturkce) yê Xyê ku 264 hezar şopînerên wê hebûn, hesabê JINNEWSê (@jinnewsturkce) ku 168 hezar şopînerên wê hebûn û hesaba rojnameya Yenî Yaşamê (@yeniyasamgazete) ku 125 hezar şopînerên wê hebûn di nav de 31 hesabên medyaya civakî hatin astengkirin.

Li aliyê din hesabên instagramê yên Rojnameya Yenî Yaşamê û JINNEWS’ê jî hatin girtin.

Li aliyê din RTUK’ê jî weke dozgerên lêpirsîn dane destpêkirin tevgeriya û weşanên ku şewata otelê ya li Bolûyê jî di nav de rexne kirin der barê 8 bernameyan de cezayê pere yê îdarî da. Di meha Çileyê de xwegihandina 10 malperên înternetê û 361 nûçeyan hate astengkirin."