DFG: Di Gulanê de di 43 dozan de 78 rojnameger hatin darizandin
Komeleya Rojnamegerên Dicle Firatê (DFG) rapora Binpêkirina Mafên Mirovan a meha Gulanê ya rojnamegeran aşkere kir. Li gorî raporê 3 rojnameger hatin girtin, 78 rojnamegeran hatin darizandin û ceza li 4 rojnamegeran hat birîn.
Di raporê de hat gotin ku di meha Azadiya Çapameniyê ya Cîhanê de jî zextên li rojnamegeran hatiye kirin û wiha hat gotin:
"Di meha Gulanê de, rojnamegerên ku bûyerên civakî û dozên girîng dişopandin, şopandina wan a nûçeyan bi awayekî keyfî hate astengkirin. Rojnamegerên ku dixwestin rastiyê ji raya giştî re ragihînin, hatin astengkirin ku geşedanên li Taksîmê yên 1ê Gulanê, doza xwendekarên ku di xwepêşandanên Saraçhaneyê de hatine girtin û danişîna Narîn Guranê bişopînin. Di van astengkirinan de mûameleya xerab li rojnamevanan hate kirin."
Her weha li gorî raporê di meha Gulanê de 3 malperên înternetê hatin girtin, 12 nûçe û 465 naverokên medyaya civakî hatin astengkirin.
DFG: Di meha Mijdarê de 21 rojnameger hatin desteserkirin
31 rojnameger girtî ne
DFGê bi bîr xist ku 31 rojnameger hêj girtî ne û binpêkirinên mafan wiha rêz kir:
"Êriş li 2 rojnameger hatiye kirin, bi ser malên 2 rojnamegeran de hat girtin, 4 rojnameger hatin binçavkirin, 3 rojnameger hatin girtin, 7 rojnameger rastî îşkence û pêkanînên xirab hatin, gef li 4 rojnamegeran hat xwarin, 10 rojnameger dema nûçe dişopandin hatin astengkirin, der barê 10 rojnamegeran de lêpirsîn hat destpêkirin, ceza li 4 rojnamegeran hat birîn, 2 sal û mehek ceza li rojnamegeran hat birîn û 32.940 TL cezayê pere li rojnamegeran hat birîn."
DFGê diyar kir ku 31 rojnameger hê jî girtî ne û destnîşan kir ku bi piştevanî û têkoşîna hevpar wê azadiya çapemeniyê biparêzin.
(AY)
