Fotograf: CNN
Ji bo nûçeya tirkî bitikîne
Li gorî lêkolîneke ku li Ingilistanê hatiye kirin, derziya HPVyê (human papillornavirus) mirovan nêzîkî ji sedî 90 ji pençeşêra malzarokê diparêze.
Li gorî nûçeya BBCyê, encamên lêkolînê di kovara tipê ya bi navê Lancetê de hatiye weşandin. Lêkolîn li ser wan pêşketinan kirine ku bê ka piştî derzî di sala 2008a de li Ingilistanê li mirovan xistine, guhertinên çawa bûne.
Li gorî vê lêkolînê, derziya HPVyê (human papillornavirus) mirovan ji sedî 87 ji pençeşêra malzarokê diparêze. Prof. Peter Sasieni, lêkolînerê ku ji Kings College Londonê beşdarî vê xebatê bûye, gotiye, “Bandora wê gelek e.”
Saziya Lêkolîna Pençeşêrê ya Ingilistanê (Cancer Research UK) jî diyar kiriye ku encam dîrokî ne û derziyê ispat kiriye ku mirovan rizgar dike.
Hemû cûreyên pençeşêra malzarokan ji ber vîrusan pêk tên. Lêkolîner hewl didin ku bi derziyan nexweşiyê bi temamî ji holê rakin.
Dîsa li gorî lêkolîneran kesên derzî li wan ketine, wê kêmtir testa simirê çêbikin.
Li Ingilistanê derzî belaş e
Li Ingilistanê derzî ji bo zarokên keç ên temenê wan di navbera 11 û 13yan de ye, belaş e.
Ji 2019an û vir ve derziyê li zarokên kur jî dixin.
Li gorî lêkolînê programa derzîkirinê ya HPVyê nehiştiye 450 pençeşêr çêbibe û 17 hezar û 200 kes bi nexweşiya pançeşêrê bikevin.
HVP navê komeke vîrusan e ku heman cûre ne. Navê wê yê dirêj “human papillornavirus e.”
Ji sedî 99ê nexweşiyên pençeşêra malzarokan de HPV heye.
Li Tirkiyeyê ji bo belaş bibe kampanya li dar dikevin
Heta niha 100 cûreyên vîrusa HPVyê diyar bûne.
Ji bo bidawîkirina pençeşêra malzarokan, Rêxistine Tenduristiyê ya Cîhanî li 100 welatan programa derzîkirinê bi rê ve dibe.
Ji bo derziyên HPVyê belaş bên kirin, li Tirkiyeyê jî kampanya li dar dikevin.
Ji bo derziyên HPVyê bikevin nava programa derzîkirinê ya netewî, HDPyê pêşniyarnameyek pêşkêşî Parlamentoyê kiribû.
Li Tirkiyeyê dozek derziyê nêzîkî 700 TLyî ye. Divê her mirovek sê dozan li xwe bixin. Wê gavê ji bo derziyê divê zêdetirî 2 hezar lîre pereyan bidin. (EMK/FD)
