Di 15ê Gulana 1932an de, bi pêşengiya rewşenbîr û zimannasê Kurd, Celadet Elî Bedirxan û hevalên wî, Kovara Hawarê li bajarê Şamê bi tîpên Latînî hat derxistin.Kovara Hawarê ji ziman, çand û nasnameyê bigire heta wêjeyê, di gelek qadên rewşenbîrî de şoreşeke mezin pêk anî.
Ji wê rojê ve 15ê Gulanê ji bo kurdan xwedî girîngiyekî mezin e û taybet e. 15ê Gulanê di sala 2006an de weke “Roja Cejna Zimanê Kurdî” hat ragihandin û gelê Kurd jî ji sala 2007an ve her sal 15ê Gulanê weke "Cejna Zimanê Kurdî" pîroz dikin.
Tê zanîn ku zimanê kurdî hema bêjin di her pêvajoyeke dirêjahiya dîrokê de rastî polîtîkayên qedexekirinê û zextan hatiye.
Ji ber vê yekê ye ku Kovara Hawarê di geşedan û pêşveçûna zimanê kurdî de roleke tarîxî lîstiye. Lewre roja destpêka weşana kovarê wek Cejna Zimanê Kurdî tê pîrozkirin.
Di heman demê de piştî demeke dirêj pêvajoyeke aştiyê careke din di navbera Dewletê û PKKê de destpê kir. Di pêvajoyeke wek niha de gelo divê ji bo aqûbeta parastina zimanê kurdî çi bê kirin?
Bi boneya Roja Cejna Zimanê Kurdî Me berê xwe da yek ji saziya zimanê kurdî ya li Wanê ,Kurdîgehê û em behsa kar û xebatên saziyê û her wiha behsa pêngavên ku hewceye di vê pêvajoya aştiyê de ji bo statuya zimanê kurdî bêavêtin, axivîn.
Hevserokê Kurdîgehê Mesût Kertîş û yek ji dersdêrên Kurdîgehê Şevket Acar bi bianetê re axivîn û gotin:
“Ligel hemû politikayên tunekirina zimanê kurdî jî, bi salane ku kurd ji bo hebûna zimanê xwe li berxwe dane. Lêbelê di pêvajoyeke weke niha de divê êdî dewlet samimiyeta xwe nîşan bide û bi lezgînî qevzekî biavêje . Divê bi awayekî demildest kurdî bibe zimanê fermî.”
*Fotograf: Malpera Kurdîgehê
(WT/AY)
