Derbarê Şaredariya Bajarê Mezin a Enqereyê de lêpirsîn hat destpêkirin

Walîtiya Enqereyê bi îdiaya ku “Zirar daye malê cemaweriyê” derbarê Şaredariya Bajarê Mezin a Enqereyê de lêpirsîn da destpêkirin.

Şaredariyê têkildarî lêpirsînê daxuyaniyeke nivîskî weşand û bi bîr xist ku mifetîşan demek berê têkildarî hinek çalakiyên çandî û hunerî yên di navbera salên 2021-2024an de ji aliyê şaredariyê ve hatine lidarxistin, lêkolîn dikirin. 

 Li gorî nûçeya Ajansa Mezopotamyayê di daxuyaniyê de hatiye gotin ku lêkolîna ji aliyê mifetîşan ve ji bo 130 konseran hatibû destpêkirin bi dawî bûye û wiha hatiye gotin:

“Di encama lêkolînê de ji bo 97 konseran tu bêusûlî nehatin tespîtkirin û derbarê van çalakiyan de destûra lêpirsînê nehatiye dayin. Lê belê ji bo 33 konseran jî bi îdiaya ku zirar gihandiye malê cemaweriyê destûra lêpirsînê hatiye dayin. Dixwazin bi taybet bibêjin ku ev çalakî di demên berê de di bin venêrîna rûtîn a Dîwana Çavdêriya Darayî de û di teftîşên rûtîn ên Wezareta Karên Hundir bi hûrgilî hatiye lêkolînkirin û rastî tu hêmayên neyînî nehatine. 9 xebatkarên şaredariyê ku bûne mijara biryarê û der heqê wan de lêkolîn hatiye kirine, mafên xwe yên hiqûqî bi kar anîn û li Dadgeha Îdarayê ya Herêmê dê îtîrazê bikin.”